________________
[२६९]
सत्त वि कहियाओ तहा, नरए वासा य नेरइया ॥ रयणपह-सक्करपहा, वालुयपह-पंकपह य धूमपहा । तमपह-महातमप्पह-नामाओ सत्त पुढवीओ ॥ तासु य नरयावासा, फूहडया (?) तेसु वज्जमयकंटा । भिण्णमुहा घडया-लया य तम्मज्झ उववण्णा ॥ कयपावा कूरजिया, तंमि रसंता तत्थ किलेसेणं । कंटयफोडिज्जंता, परमाहम्मियसुरेहिं च ॥ कड्ढित्तु बला बाहिं, सिलासु फोडिऊण कढिणासुं । छिज्जंति मडिज्जंति य, सुमरावियपुव्वदुकएहिं ॥ सयसिक्करा य होउं मिलंति पुण पारओ व्व नेरइया । पुढवितिगपढममुण्हं, सीयाओ सेसपुढवीओ ॥ परमाहम्मियरहियाओ तासु कंकडगिहे व्व नेरइया । होंति परोप्परुद्दालियदुक्खा सययं जओ भणियं ॥ अच्छिनिमीलियमेत्तं, नत्थि सुहं दुक्खमेव पडिबद्धं । नरए नेरइयाणं, अहोनिसिं पच्चमाणाणं' ॥
सोउं चेमं संजायविम्हया भणइ पुप्फचूला उ । 'भयवं ! किं तुब्भेहिं, वि दिट्ठो एवंविहो सुमिणो ?' | सूरी वि भणइ 'भद्दे !, विणा वि सुविणं जिणागमेणेव । तं नत्थि जं न नज्जइ', तत्तो देवीए भणियमिणं ॥
'केहिं पुण कम्मेहिं, भयवं ! वच्वंति पाणिणो नरए ?' । सूरी वि भणइ 'साहेमि [ जिणागमे जहा भणियं' ॥] पंचिदियवहेण कुणिमाहारेण महारंभ - परिग्गहेण । तह गुरुपच्चणीयाएँ, जीवा वच्चंति नरएसुं ॥ तत्तो जणणीदेवेण पुप्फचूलाए सग्गसोक्खाणि । संदरिसियाणि; ताणि य, तीए कहियाणि नियपइणो ॥ तेण वि सद्दावित्ता, पुट्ठा पासंडिणो पुणो सव्वे । सग्गसरूवं; तेहि वि, भणियं 'पियसंगमो सग्गो' ॥ 'सुहकारण 'मण्णेहिं, तेसु य नेगो वि देविसग्गेणं । संवयइ य तओ रण्णा, सद्दाविय पुच्छिओ सूरी ॥ तेण वि भणियं 'सग्गो, देवनिवासा ठिया सुरा तेसु ।
भवणवइ वंतरा जोइसा य वेमाणियनिवासा ॥ सोहम्मीसाण - सणकुमार - माहिंद - बंभलोया य । लंतय-महसुक्क - सहस्साराणय-पाणयारणच्चुयया ॥
—
-
-
