Page Text
________________
[२६३]
सिद्धमि गोयमंमि उ, चोद्दसपुव्विस्स जंबुनामस्स । दाऊण गणं कमसो, सुहम्मसामी [वि] सिद्धो त्ति ॥छ। गोयमाईय त्ति गयं ॥छ। काउं च पभवसूरिं, जंबूसामी वि वीरमोह(सामि?)स्स । मुत्तिसमयाउ पत्तो, चउसट्टि समाहिमोक्खं ति ॥ .. जंबुंमि य मणपज्जव १, परमोहि २ पुलायलद्धि ३ जिणकप्पो ४ । आहारयं सरीरं ५, उवसमसेणी ६ खवगसेणी ७ ॥ परिहारविसुद्धीयं, सुहुममहक्खायमिइ चरित्ततिगं ८ । केवलनाणं ९ मोक्खो १०, वोच्छिण्णा दस वि भाव त्ति ॥छ।
जंबूनामो त्ति गयं ॥छ। जंबूनामपडिसज्जो(?) य सेज्जंभवो त्ति ॥छ। सेज्जंभवकहा भण्णइ - पभवसूरत्ते(सूरिणो) मज्झरत्ते चिंता समुप्पण्णा - 'को मे गणहरो होज्जा ?' अप्पणो गणे संघे य कंमि वि उवओगो फओ। न दीसह य वोच्छित्तिकरो । ताहे दरिसणंतरेसवओगं देइ । जाव रायगिहे सेज्जंभवबंभणं जण्णं जजमाणं पासइ । ताहे रायगिहं नगरं आगंतूण संघाडगं पेसेइ जहा – 'जण्णवाडं गंतुं भिक्खट्ठा धम्मलाभेह । तत्थ य तुब्भे बंभणेहिं पट्ठाविज्जंता भणेज्जह - "अहो कटुं, तत्तं न नज्जए परं" ।' तत्थ य भिक्खत्थं गएहिं साहूहि भणियं - 'अहो कटुं, तत्तं न नज्जए परं' । तेण य सेज्जंभवभट्टेण जण्णवाडदारदेसट्ठिएणं तं साहुवयणं सोउं 'अहो ! एए उवसंता तवस्सिणो ण असच्चं जपंति'त्ति चिंतिउं गंतूणुवज्झायसमीवे भणियं - "किं तत्तं ?' उवज्झाओ भणइ – 'वेया तत्तं' । तओ सो खग्गमुप्पाडित्ता भणइ – 'सीसं ते छिंदामि जइ मे संपयं सच्चं न कहेसि' । तओ चिंतियं उवज्झाएण – 'जाओ सच्चतत्तकहणसमओ एसो । जओ भणियमिणं वेदंमि - "सिरच्छेए परं तत्तं कहेयव्वं, न अन्नहा" । ता संपयं कहेमि एयस्स जमेत्थ तत्तं' । तओ उवज्झाओ भणइ – 'एयस्स जागजूयस्स हेट्ठा रयणमई पडिमाऽरिहंतस्स पच्छण्णा जेण पूइज्जइ तेण. तस्स चेव धम्मो तत्तं' ।
तओ सो उवज्झायस्स पाएसु पडिओ तं जागोवगरणं तस्सेव दाऊण निग्गओ ते साहुणो गवेसमाणो संपत्तो पभवसूरिसमीवं । तओ सह साहूहिं पभवसूरि वंदित्ता भणइ – 'मम धम्मं कहेह' । ताहे आयरिया उवउत्ता जहा – 'इमो सो' । ताहे सूरीहिं साहुधम्मो कहिओ । पव्वइओ य । तओ पभवसूरिणा गणाहिवई कओ त्ति ॥छ। पभवो त्ति गयं ॥छ।।
पभवपव्वाविओ य जया सेज्जंभवो तया तस्स भज्जा गठिवणी आसि । तंमि य पव्वइए लोगो सयणवग्गो य तमतमइ जहा – 'तरुणीए भत्ता ए[स] पव्वइओ । पुत्तुप्पत्ति पि न पडिक्खिओ' । 'अत्थि य तव किंचि पोट्टे ?'त्ति पुच्छंति । सा भणइ - 'उवलक्खेमि मणागं मंणागं' । तओ समएण दारओ जाओ । निव्वत्ते य बारसमे दिणे नियल्लगेहिं 'माउ(माऊए) [मणागु'त्ति कहियं] काउं ठइयं मणगो त्ति नाम से । जया ज अट्ठवरिसो संवुत्तो तया सो मायरं पुच्छइ – 'को मम पिया ?' सा भणइ - 'तव पिया पव्वइओ' । ताहे सो दारओ निस्सरिऊण पिउसगासं पट्ठिओ।
आयरिया य तं कालं चंपाए विहरति । सो वि दारओ चंपमेवाऽऽगओ । सूरिणा य बाहिरभूमि गएणाऽऽगच्छंतो दिट्ठो । दारएण वंदिओ आयरिओ । आयरियस्स य तं दारगं पेच्छंतस्स नेहो जाओ।
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |