________________
[२६०]
सावओ नाविलो होही, सच्चसिरी य साविया । अज्जा फग्गुसिरी; सूरी, दुप्पसहो जो सिज्झिही ॥ सोहम्मे सरगे गंतुं, सो मरिही जया पुण । वीसवासाउओ एत्थ, तया [य] पंचमोऽरओ ॥ जाही वाससहस्सेग-विसई; एत्तिओ च्चिय । तत्तो छट्ठोऽरओ होही, सू(दू)समदूसमो तहिं । पलयकालचंडा स(य), चंदक्का सीउण्हा तहिं । वेयड्डन्नं नगाईयं, डहीहिति जहा तओ ॥ भारहो भासरासीव, पायं होही तहुंडयं । पूरेही पलयक्काल-वाऊ सोसेहि[इ] जलं ॥ गंगा-सिंधुनईपडं, मोत्तुं मट्टिहिं(रहपह?)ट्ठियं । पलयकालमेहा य, वरिसिस्संति दारुणा ॥ सहावोरुण्ह(?)नीरेहिं, तिरिबीयं तु थक्किही । नगाओ के वि होहिंति, वेयड्डादारओ परं ॥ सिंधु-गंगट्ठकूलेसुं, हत्थमाणा निलक्खणा । दिणं गमित्तु राईए, निग्गया तुच्छनीरजे ॥ बहुमच्छ-कच्छवाई, घेत्तुं खाहिति निद्दया । गंगासिंधुजलुम्मुक्क-पुलिणंतो य गोविउं । निसंते पविसिस्संति, बिलेसुं पुण निग्गया । बीयराईए ते जीवे; सूररस्सिभलुस्सिए ॥ घेत्तुमण्णे थवित्ता य, भुंजिस्संति अहण्णियं । तेसिं च सोलसवासा, एयणुक्कोसमाउयं ॥ छव्वरिसुड्डमित्थी य, छम्मासे गब्भधारिणी । होउं पसविही; भोगे, तव्वेलं वि पधुंजिही ॥ एवं च बहवो तेसि-मप्पजीवीण डिंभगा । निरुज्जमाण होर्हिति, पुत्त-णाताइया तहा ॥ जस्स थोवं पि वन्नाई, होही सो तेसिमीसरो । पंडिओ पयमेत्तेणं, धम्मवत्ताए धम्मिओ ॥ सम्मदिट्ठी महच्छेरमेवं छठेऽरए गए । ॥छ।। एगा ओसप्पिणी जाही, कोडाकोडिदसायरा ॥ तत्तो उस्सप्पिणी होही, छाऽऽरय च्चिय किंतु सा । दूसमदूसमाईया, सूसम-सूसमंतिया ॥ विवरीया उ होहिंति, तीए उस्सप्पिणीगया । तावा(व?) कुलगराईया, पवटुंता जहाऽरया ॥
