Page Text
________________
[२४८]
नियज्झाणाओ । तओ देवीए(देवेण?) पुणो वि पउणीकयसरीरं कामदेवं संवरियपिसायरूवो तओ मत्तगुलगुलायमाणो महंतहत्थिरूवेणाऽऽगओ देवो माणुसभासाए भणइ - 'जिणधम्मं जइ न चयसि तो मारेमि' । तहा वि निच्चलं तं सुंडदंडेणुच्छालित्ता गयणंगणे पडतं दंतमुसलेहि पडिच्छइ । तओ धरणीतले पाडेत्ता पुणो पुणो पाएहि दरमलेइ । तहा वि दट्ठमचलियचित्तं महाकोवमुग्गविसप्परूवेणाऽऽगओ पच्छिमभाएण गीवं गाढं वेढित्ता तिक्खदाढाहि निसढं पुणो पुणो डसेइ तहा वि न चलिओ महासत्तो कामदेवो ।
___ तओ तुट्ठो देवो [नियरूवं दंसिऊण तं खामित्ता पसंसिऊण य गओ नियठाणं कामदेवो वि चिंतेइ -] 'महावीरं वंदित्ता पोसहं पारेमि' । तओ परिमियपरिवारो निग्गओ गिहट्ठियपोसहसालाओ । पत्तो भगवंतमूलं । समुवविठ्ठो य वंदित्ता भत्तीए । भगवया वि तीसे देव-मणुयासुराए [परिसाए] धम्मदेसणाणुसंगेण साहिऊण सवित्थरं रयणिजणियमुवसग्गं संभासिओ कामदेवो । भणिया य गोयमाईया समणा – 'भो भो महाणुभावा ! गिहत्थेणाऽवि होउमेवमहियासिया पाणंतिउवसग्गा कामदेवेणं । तुब्भेहिं पुण परिचत्तगिहवासेहि विसेसओ अहियासेयव्वा' । तओ सव्वेहिं वि 'तह'त्ति पडिवन्नं । विहरिओ य देसंतरेसु महावीरो ।
___ कामदेवो वि पोसहसालाठिओ छव्वरिसाणि किंचूणाणि विविहतवोविसेसेहिं तवसोसियंगो सव्वं च सावयत्तणं वीसं वरिसाणि पालिऊण य कयाणसणो सोहम्मे कप्पे अरुणाभविमाणे चउपलिओवमाऊ देवो जाओ । तओ चुओ महाविदेहे सिज्झिस्सिइ ॥ छ॥२॥ जहा चुलिणिपिया । तं जहा -
वाणारसीए जियसत्तू राया । तत्थ चुलिणिपिया नाम भंडसालिओ । तस्स *भद्दा(सामा) नाम भज्जा। निहाण-कलंतर-ववहारविलग्गाओ दम्माणं अट्ट कोडीओ । दसदसगोसाहस्सियाणि य अट्ठ गोउलाणि । [अण्णया] कोहगुज्जाणे भगवया समोसरिएण संबोहिओ सभज्जो सावओ जाओ । पण्णरसंमि य वरिसे जेट्ठनिक्खित्तारंभभारो पविट्ठो गिहट्ठियपोसहसालाए । तस्स य पुरओ मिच्छदिट्ठी देवो जेट्टपुत्तमाणित्ता खग्गेण खंडखंडं करेइ । तओ तंमि सहिए तहेव लहुपुत्तं करेइ । तंमि वि सहिए भद्दाभज्ज(मायर)माणित्ता खग्गेण खंडखंडं काउमाढत्तो । तं च दट्ठण संजायामरिसो चुलणिपिया धाविओ देवगहणत्थं । देवो वि 'धम्मझाणाओ खुहिय'त्ति कलिऊण गओ नियट्ठाणं । चुलणिपिया पोसहसालासंतियं पुण थंभमेगं हत्थेहि घेत्तूण गाढं वुब्भुइउमाढत्तो । तं च वुब्भुयासदं सोऊण धाविया भद्दा । पत्ता चुलणिपियासमीवं । दटुं च तं तहावट्ठियं भणइ – 'किमेयं ?' कहिए य चुलणिपिउणा निरवसेसवुत्तंते भणियं भद्दाए – 'महाणुभाव ! खोहिओ तुमं केणाऽवि देवाइणा धम्मज्झाणाओ । ता संपयं निप्पकंपेणं होयव्वं' । तओ चुलणिपिया छव्वरिसियतवसोसियंगो अणसणं काऊण सोहम्मे अरुणाभे विमाणे देवो जाओ । तओ चुओ महाविदेहे सिज्झिस्सिइ त्ति ॥छ।।३।।
जहा य वाणारसीए चुलणिपिया तहा सुरादेवो वि भंडसालिओ वत्तव्यो । नवरं सामा(धन्ना) भज्जा । छ छ च्च दम्मकोडीओ छच्च गोउलाणि । पोसहसालाए य तिण्णि पुत्ते पुरओ विणासित्ता भज्जाविणासणठाणमि देवो भणइ – 'जइ धम्मं न चयसि तो ते सरीरे सास-खास-दाहज्जराईए महारोगे पक्खिविस्सामि सच्चविओ कामस्स य कहं वि ते देवसत्तीए' । [तो] देवस्स भीओ सुरादेवो वुब्भुयंतो य धाविओ जा पिट्ठओ ता नट्ठो देवो । गहिओ य सुरादेवेण पोसहसालार्थभो । समागया सामा(धन्ना)। तओ जहा चुलिणिपिया तहेव, जाव महाविदेहे सिज्झिस्सिइ ॥छ।४॥ जहा चुल्लसयओ । तं जहा - * सामा इति उपासकदशाङ्गसूत्रे ।
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |