Page Text
________________
[२४१]
चलिया । गोयमो वि भगवंतं पयक्खिणिऊण पाएसु पडिओ उट्ठिओ भणइ – 'कहिं वच्चह ? एह, सामि वंदह' । भगवया भणियं - 'गोयमा ! [मा] केवलिणो आसाएहि' । सोउं चेमं सो पच्छुत्ताविओ खामेइ संवेगं च गओ चितेइ – 'अहं न चेव सिज्झेज्जा' । इओ य सामिणा पुव्वमेव वागरियं अणागए गोयमंमि आसि जहा - 'जो संपयमट्ठावयं चरणचारी मणूसो समारुहइ सो तेणेव भवग्गहणेणं सिज्झई' । तं च देवा अण्णमण्णस्स कहेंति जहा - 'किर अट्ठावयं जो माणुसो स[मारुह]इ सो तेणेव भवेण सिज्झइ' ।
तओ गोयमो चितेइ जह - 'अट्ठावयं वच्चेज्ज' तओ सामी तस्स हिययाकूयं तहा 'तावसा य संबुज्झिहिति'त्ति नाऊण गोयमं भणइ – 'वच्च गोयम ! अट्ठावयं चेइयवंदओ' । ताहे भगवं गोयमो हट्ठतुट्ठो सामि वंदित्ता गओ अट्ठावयं ।
इओ य तं भगवंतपरूविअं जणाओ सोऊण तिण्णि तावसा पंचपंचसयपरिवारा पत्तेयं पत्तेयमट्ठावयसमारोहणत्थमागया । तं जहा - कुं(को)डिन्नो १, दिन्नो २, सेवालो ३ । तत्थ य कुं(को)डिन्नो सपरिवारो चउत्थं चउत्थेण मूलकंदाणि सच्चित्ताणि आहारेइ । सो य तवपहावओ अट्ठावयस्स पढमं मेहलं विलग्गो । दिन्नो वि छठें छद्रेण परिसडियपंडुपत्ताणि आहारेइ । सो य बीयं मेहलं विलग्गो । सेवालो उण अट्ठमं अट्ठमेण सयं सुक्कं सेवालं आहारेइ । सो य तइयमेहलं विलग्गो ।
तओ य भगवंतं गोयमसामि ओरालसरीरं तेयड्डमट्ठावयाभिमुहं आगच्छमाणं तेसिं तिण्णि वि पासिऊण भणंति - ‘एस कहं थूलसमणओ एत्थ विलग्गिहिइ ? जं अम्हे महातवस्सिणो सुक्खा भुक्खा न तरामो विलग्गिउं ?' भगवं च गोयमो जंघाचारणलद्धीए कोलियगतंतुनिस्साए वि उप्पइओ त्ति जोएंता चेव ते अच्छेरेइ जहा - "एस आगओ एसऽसणं गओ' । एवं च तिण्णि वि सविम्हयमुद्धं पलोएंता चिंतेंति [जह] - 'जइ भगवं उत्तरिस्सइ तो वयमेयस्स सीसा होस्सामो' । गोयमो वि चेइयाणि वंदित्ता उत्तरपुरत्थिमे दिसाभाए पुढविसिलापुट्ठए असोगवरपायवस्स अहे तं रयणि वासाय उवगओ ।
इओ य सक्कदिसावालो वेसमणो अट्ठावए चेइयवंदओ आगओ । सो य चेइयाणि वंदित्ता गोयमसामि वंदेइ । तओ सो भगवं धम्मकहावसरे अणगारगुणे परिकहेइ । जहा - 'भगवंतो साहवो विविहतवसोसियंगा किससरीरा भवंति' । वेसमणो चिंतेइ – 'एस भगवं एरिसे साहुगुणे वण्णेइ । अप्पणो य से इमा सरीरसुकुमारया जा देवाण वि नत्थि' । तओ भगवया तस्स चिंतियं नाऊण भणियं - 'वेसमण ! ववहारओ मए पन्नविया [साहवो] । निच्छयओ पुण भावसारा चेव साहवो जहा पुंडरीओ त्ति ॥ पुंडरीयकहा भण्णइ -
___इहेव जंबुद्दीवे भारहे वासे महाविदेहे पोक्खलावइविजए पुंडरीगिणीए नयरीए महापउमो नाम राया। पउमावई से देवी । ताणं दुवे पुत्ता, पुंडरीओ कंडरीओ य । अण्णया तत्थ थेरा बहुपरिवारा नलिणिवणे उज्जाणे समोसढा । तओ महापउमो तस्स(तेसि) समीवे धम्म सोच्चा पुंडरीयं रज्जे ठवित्ता पव्वइओ । होउं च चउदसपुव्वी पालियबहुवरिससामन्नो मासियाए संलेहणाए संपत्तकेवलो महापउमो गओ निव्वाणं । ते य थेरा विहरंता पुणो पत्ता पुंडरीगिणीए । तव्वंदणत्थं च निग्गया पुंडरीय-कंडरीया । सोउं च सह धम्मदेसणं संबुद्धा बहवे पाणिणो । संजायचरणपरिणामो य पविट्ठो पुंडरीगिणीए पुंडरीओ । सद्दाविउं च मंतिणो तस्समक्खं भणिओ अणेण कंडरीओ - 'वच्छ ! विरत्तोऽहं संसारवासाओ । ता पडिवज्जसु रज्जं जेण करेमि पव्वज्ज' । कंडरीओ भणइ - 'विरत्तोऽहं पि संसाराओ गेण्हिस्सं पव्वज्जं ।
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |