Page Text
________________
[२४०]
सगुरू य पउमदेवो, सिद्धो; अह घरिणि-सेट्ठि-सत्थाहा । उदयणराया य गया, कालेण देवलोयं ति ॥ एवं च कूणिओदयणरज्जकालब्भवा तरंगवई ।
वीसमइ कहा रम्मा, भद्देसरसूरिरइय त्ति ॥छ। [तरंगवइ त्ति गयं] || असमिक्खकारी य नरवई कूणिओ । चंपाए समोसरिओ महा[वीरो] । [ताहे सो चिंतेइ -] 'ममाऽवि गयासरहपाइक्का [बहुगा] । ता जामि पुच्छामि [य] सामि - किमहं चक्कवट्टी न वा ?' तओ निग्गओ सव्वबलसमुदएणं वंदित्ता भणइ – 'भगवं ! केवइया चक्कवट्टिणो भविस्संति ?' सामी भणइ – 'सव्वे अईया' । कूणिओ भणइ – 'कहियं ते अपरिचत्तकामभोगा मरिऊणुववज्जति ?' सामी भणइ – 'सत्तमपुढवीए' । कूणिओ भणइ – “किं सत्तमपुढविं न जामि ?' सामी भणइ – 'तत्थाऽऽरंभी [पव्वज्जियं] विना सव्वो वि [चक्कवट्टी] गच्छई' । कूणिओ भणइ – "किं नाऽहं चक्कवट्टी ?' सामी भणइ – 'तुज्झ रयणाणि न संति' । तं च सामिकहियं सोउं पि संकामोहोदयाओ असद्दहंतो विव कूणिओ लोहाईहिं चक्काईणि कारिमरयणाणि कराविउमारद्धो ।
संकिओ कूणिओ व्व गोयमो वि सामि[क]हिए किंतु नच्चिसया(निव्विसंका?) सालाईय त्ति ॥ सालाइकहा भण्णइ -
___ इहेव जंबुद्दीवे भारहे वासे पोयणपुरे बीयनामेण पिढिचंपाए सुभूमिभागे उज्जाणे समोसरिओ महावीरो । तत्थ पसण्णचंदपुत्तो सालो नाम राया । तब्भाया य महासालो नाम जुवराया । तेसिं च भगिणी जसमई नाम परिणीया कंपिल्लपुरे पिढररायउत्तेणं । तीसे य सुओ गागली नाम कुमारो । सो य सालो भगवओ समीवे धम्मं सोऊण भणइ जं - 'नवरं महासालं रज्जे अहिसिंचामि । तओ तुब्भं पायमूले पव्वयामि' । तओ गंतूण भणिओ महासालो – '[अहं पव्वयामि, तुमं] राया भवसु' । [सो भणइ] - 'जहा तुब्भे रज्जमिममसारं चयह तहा अहं पि चइस्सं' । तओ दोहि [पि] पव्वज्जं काउकामेहिं कंपिल्लपुराओ सद्दाविओ जसमईए पुत्तो गागलिकुमारो समहिसित्तो [य] नियरज्जंमि । गागलिणा वि निक्खमणमहिमत्थं तेसिं दो पुरिससहस्सवाहिणीओ सिवियाओ करावियाओ । जाव ते पव्वइया । सा वि तेसिं भगिणी समणोवासिया जाया । तेहिं एक्कारसअंगाई अहिज्जियाई ।
अण्णया भगवं रायगिहे समोसढो। तओ निग्गओ चंपाए अभिमुहो चलिओ । ताहे साल-महासाला सामि आपुच्छंति - 'अम्हे पिट्टिचंपं वच्चामो । जइ नाम को [वि] तेसिं पव्वज्जं सम्मत्तं वा लभेज्जा' । सामी जाणइ जहा – 'ताणि संबुज्झिहि'त्ति । ताहे तेसिं सामिणा गोयमसामी बिइज्जओ दिन्नो । [सयं च] चंपं गओ, गोयमो उण पिट्ठिचंपं गओ । तत्थ समोसरणं । गागली पिढरो जसमई य निग्गया [नयराओ] । सोउं च धम्मं ते निविण्णा । तओ गागली पुत्तं रज्जे अहिसिंचिऊण माया-पियासहिओ पव्वइओ । गोयमसामी वि तं घेत्तूण चंपं वच्चइ । तेसिं च साल-महासालाणं पंथे वच्चंताणं 'संसाराओ एए उत्तारिय'त्ति चिंतावराणं सुभेणऽज्झवसारण केवलनाणं समुप्पण्णं । गागली-पिढर-जसमईणं पि 'अम्हे एएहिं रज्जे ताव ठविया, पुणरवि धम्मे ठविऊण संसाराओ मोइअत्ति चिंतिताणं सुहेणऽज्झवसाएण तिण्ह वि केवलनाणं समुप्पण्णं।
एवं च ते उप्पन्ननाणा समागया चंपं । पयक्खिणेउं [भगवंतं] तित्थं नमिऊण केवलिपरिसाभिमुहं
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |