________________
[२३८]
गंतुं चोत्तरहुत्तो, पत्तो मुक्काउहो पुरिमतालं । नयरं; तस्सोज्जाणे, देउलपुरओ वडं रम्मं ॥ दटुं पुच्छामि जणं, – 'इणमो किं नामयं उववणं?' ति । 'कस्स य देवस्स इमा, कीरइ य सुंदरी पूया ?' || तो पाहुणं ति नाउं, तत्थ जणो मं भणेइ जाणगओ । 'इणमो उज्जाणवरं, सगडमुहं नामिह वडे य । हेट्ठा रिसहेसरकेवलपभवो ति महिमा जणेणेसा । अज्ज वि कीरइ; ठविया, तस्सिमा देउले पडिमा' ॥ एवं च सोऊण अहं, वडं च पडिमं च वंदिऊण तहिं । पस्सामि तवगुणनिहिं, समणं तत्थेक्कपासंमि ॥ तं च विणएण पणमिय, भणामि वेरग्गमग्गमोइण्णो । 'इच्छामि ते महायस !, सिस्सो सुस्सूसओ होउं' ॥ तेण य भणियं - 'दुक्खं, काउं समणत्तणं'ति बेमि अहं । 'धीरस्सा नत्थि दुक्करं' ति य पव्वाविओ विहिणा ॥ एक्कारसंगगाही, नवपुव्वधरो य होउ विहरामि । एवं च मज्झ जाया, मिहुणनिमित्ता तविड्ढि'त्ति ॥ सोउं चेमं अम्हे, सपच्चया दो वि घरिणि ! दिट्ठीए । मेलिच्छि विचितेमो, परंमुहा विसयसोक्खस्स ॥ 'जइ ताव कूरकम्मो, होऊण इमो वि संजओ जाओ । ता जोग्गा वि किमम्हे, तव-चरणं पइ विलंबामो ?' ॥ तो तं वंदिय समणं, भावकयंजलिउडा य साहेमो । 'तं मिहुणं इणमम्हे, जस्स तए जीवियं दिण्णं ॥ ता इण्हि पि पडिच्छसु, इच्छामो ससस्सिउँ(सुस्सूसिउं) अम्हे' । तेणुत्तं - 'सो जाही, मोक्खं जो संजमं काही' ॥ सोउं चेमं भणिओ, सभूसणप्पावणेण पेसजणो । 'तायम्माणं कहेज्जह, सामण्णं ते पवण्ण त्ति ॥ तेसिं च विणयखलियं, खमह य किर सुहुम-बायरं सव्वं । मत्तेहि पमत्तेहि य, जं होज्ज कयं कयाई वि ॥ अस्संजएसु अत्थो, एवं विसोवमो दवग्गिनिभो । अहिकरणं ति न दिण्णो, वोसिरिओ णे'त्ति संदिसियं ॥ सोउं चेमं सहसा, उक्कूवियं परियणेण पाएसुं । लग्गेण तहऽण्णेण य, जणेण; लुंचइ सयं केसो ॥ जाव पिओ ताऽहं पि य, तहेव समणस्स तस्स पाएसुं । पडिया पिएण सह तो, भणामि - "दिक्खेह भयवं !' ति ॥
