________________
[२३३]
वोतुं च 'तुम्हमेए, ससत्थवाहेण सेट्टिणा लेहा । सहत्थलिहिय'त्ति अप्पिया [पियस्स] तेण पणएण ॥ पण घेत्तुं पिएणुच्छोडिय ते हियाविया पढमं । तो वाइया ससद्दं, मज्झ सुणावणकए लेहा | लिहियं च तत्थ कज्जं, तेहिं सयं ससहजं जहा "तुम्हं । इह का वि नाया दरी, ता इज्जह निब्भया दो वि" ॥ सोउं चेमं सत्था, जाया अह पुच्छिओ पिययमो य । कुम्मासहत्थिणा हत्थ-बंधणं दट्टु 'किमिमं ?' ति ॥ कहियं च तस्स वसणं, जहाणुभूयं पिएण तो ते । एमि बंभणकुले, कराविया सुंदररसोई ॥
जेमाविया य विहिणा, घयमक्खिय-सयलपाणिचलणवणा । निग्गच्छामो तं कुलमभिवाइऊण जच्चासमारूढा ॥ कुम्मासहत्थिभडचडयरेण परिवारिया पहुत्ता य । गंगानई पणासयपुरस्स पासेसु वहमाणि ॥ तं चाऽगाहजलं ति य नावाए उत्तरित्तु रमणीयं । [पत्ता ] पणासयपुरं, तिभागसेसे दिणंमि सयं ॥ कुम्मासहत्थि पेसिय- मणुस्ससंपाडिएण जाणेणं । तत्थ पविट्ठा तुट्ठा, पियमित्तगेहंमि रमणीए | तंमि य सुहंसुहेण, चिट्ठामो; पेसिया य कोसंबि । लेहा पिएण " कुम्मास - हत्थिसहिएण एमो "त्ति ॥ पडिलेहेहि य तत्तो, समागएहिं तहाऽऽगएणं च । पंथपरिव्वयहेउं, हिरण्ण - वत्थाइएण तओ ॥ काहावणयसहस्सं, दिन्नं मित्तहरे चेडरूवाणं । खज्जयमोल्लं ति मए, सेसाणं पि य जहाजोग्गं ॥ किच्चं करेमि कुम्मासहत्थिणा कारिया य सामग्गी । गमणनिमित्तं सुहपवहणेण चलिया य कोसंबिं ॥ तत्थ य कमेण जंता, वासालियगामसंठियं पत्ता । वडपायवं महल्लं, पेच्छामो रम्मं महंतं च ॥ दट्टु कुम्मासहत्थी, भणेइ णे जह 'पवन्नचारित्तो । छउमत्थो परिवुत्थो, एत्थं किर वडमाणजिणो ॥ जं च तयाऽऽसि पवण्णो, वासायालयमिहं महावीरो । तेणेवेसो गामो, जाओ वासालओ नाम' ॥ सोउं च तदुत्तमिणं, जाणाओ उत्तरित्तु दो वि वयं । सीसेणं वंदमाणा, वडस्स मूले निवइयामो ॥
-
