________________
[२३१]
तं च सोऊण मज्झं, सो चोरो निग्गओ पडालीओ । तासितो बंदीओ, ताओ वि लहुं पलाणासु(ओ) ॥ तासु य गयासु तो भणइ, पिययमं तक्करो मउयमउयं । 'मा भाह; अहं तुब्भे, मरणभयाओ विमो[ए]स्सं' ॥ तो पत्तो [पत्त] लीए, काउं मंसं सो भणइ अम्हे । 'जेमणमिणं ति भुंजह, [ज]ओ सुदूरंमि गंतव्वं ॥ अम्हेहिं नेच्छियं तं, नवरि तेणाऽऽणियं दुवेहिं पि । उत्ताणयकरयलसंपुडेहि उदयं तहिं पीयं ॥ तो सूरो अत्थमिओ, पल्ली वि हुडुक्कगीयसद्दाला । मत्तचोरेहि विहिया, नच्चंतेहिं जहिच्छाए ॥ तो जेमणवक्खित्ते, जणंमि; सो तक्करो पियं मुइओ । भणइ - 'मा भाह; एह य, जेणाऽहं ते पलावेमि' ॥ तत्तो तेणऽम्हे तह, कहं वि नीसारिया सपल्लीओ । जह केण वि न नाया, नेइ य पुरओ ठिओ अम्हे ॥ सो हत्थगहियधणुहो, उप्पीलिय[सर]भत्थओ सणाहो । एवं च पल्लिया से, जंता कंतारमुत्तिण्णा ॥ तो भणइ तक्करो णे - 'नेमि कंतारं ति जाह वीसत्था । एत्तो पच्छिमहत्तं, पुरओ गामं च पाविहह । अहमित्तो य चलिस्सं, खमह य जं सामियस्स आणाए । अण्णाणपमाएहि य, बद्धा पहया य पल्लीए' ॥ तो भणइ पिओ - 'दिण्णं, जीवियमम्हं तए निरासाणं । ता निक्कारणवच्छल !, वीर ! तुमं सुणसु साहेमि ॥ वच्छापुरीए पुत्तो, अहं धणदेवस्स सत्थवाहस्स । नामेण पउमदेवो, कहिही लोओ वि तव एयं ॥ ता एज्जसु कह वि तर्हि, अत्थं दावेमु ते सुविपुलं'ति ।। सो भणइ - 'जया एस्सं, तत्थ करेज्जह जहकिंचि' ॥ एवं च जंपमाणो, [चोरो निग्गओऽम्हं सयासाओ] । वच्चइ उत्तरहुत्तो, अम्हे वि गया अवरहुत्ता ॥ पत्ता य किलेसेणं, पाहियगामंमि पिययम बेमि । 'कत्थइ छुहावहारं, आहारं इह गवेसेहि' ॥ तो मं भणइ पिययमो, तक्कपरिमुट्ठमोल्लसव्वस्स । कहं विय परस्स घरं, न णज्जमाणा अईहामो ॥ वसणपरिधाडियस्स वि, "देह "त्ति न माणिणो भणिउमुचियं । अहवा तुज्झ कए मह, नत्थि अकायव्वयं किंचि ॥
