________________
[२३०]
सो तत्थ गहियसम्म-मत्थनिच्छओ भणइ थेरओ एक्कं । सद्दित्तु चोरतरुणं, जहा – 'हो ! पल्लीवई भणइ ॥ [कच्चायणीए जो] किर, जाओ सेणावईहिं कायव्वो । चाउम्मासयअंते, महिलासहिएण पुरिसेणं ॥ तत्थ किर मिहुणयमिणं, जोग्गं ति सुरक्खियं करेज्जासु' । सोउं चेमं भीया, विसेसओऽहं तहिं घरिणी ! ॥ अह सो सामियवयणं, कयंजलिउडो पवज्जिउं अम्हे । आणेइ चोरतरुणो, सपडालीपडिपडालीए ॥ धणियं च बज्झमाणं, धाउक्खंभं विहित्तु चोरेहिं । अवयासेमि पिययमं, वारेंती बंधणं तस्स ॥ एवं च ववसमाणी वि, तेण चोरेण जायरोसेणं । लत्ताहिं हंतु निब्भच्छिया य छूढा य एक्कंते ॥ दटुं चेमं धीरो वि, पिययमो भणइ – 'हा ! मह कएणं । मरणाओ अहियधरिसण-मपत्तपुव्वं पिए ! पत्ता ॥ एवं च जंपमाणे, निच्चलक्खेण य तेण चोरेणं । बद्धो पच्छाबंध, बीयं पडालि तओ गओ(जंतो) ॥ भणिओ य मए चोरो - 'कोसंबी नयरिसत्थवाहस्स । एसो एक्को पुत्तो, सेट्ठिस्स य, बालिया अहयं ॥ जत्तियमित्तं इच्छह, मणि-मुत्त-सुवण्णयं पवालं वा । तत्तियमेत्तं अम्हे, [दाहामो तुम्ह] मेत्थ ठिया ॥ तुम्हं च कोइ वच्चउ, अम्हं लेहेण [दोण्णि] कुलघराणि । लद्धमि तओ अत्थे, अम्हे मुंचेज्जह दुवे वि' || तो भणइ तक्करो सो, - 'तुब्भे कच्चायणीए जायंमि । अम्हं सेणावइणा, महापसू दो वि उद्दिट्ठा ॥ देज्जे य अदिज्जंते, कुविया य हवेज्ज भगवई अम्हं । जीए पसाएणऽम्हे, सव्वे कामे अणुभवामो' । सोउं चेमं भीया, सुट्ठयरं घरिणि ! जाव झूरेमि । तावाऽऽवाणयदेसे, केणइ महुरं समुग्गीयं ॥ अगणियनयपरिवायस्स, साहसं कम्ममारभंतस्स । [पायं] एक्कंतरिया, होइ विवत्ति व्व सिद्धी वा ॥ सोउं चेमं भणिया, पिएण - 'सोऊणिमं समुग्गीयं । मा कुण पिए ! विसायं', सत्था तो किंचि संजाया ॥ सेसाण य बंदीणं. पच्छंतीणं सदक्खचिताणं । साहेमि निययचरियं, रोवंती जं जहावित्तं ॥
