________________
[२२८]
ताऽहं तत्थाऽऽगंतुं, पणमंती पिययमेण बाहाहिं । आलिंगिऊण भणिया, – 'सामिणि ! सुस्सागयं ते' त्ति ॥ अह भणइ मं पिययमो, – 'कि साहसमेरिसं तए विहियं ?। जमहं बेमि किसोयरि ! सपसाया होउ तं सुणसु ॥ रायकुलवल्लहो अग्गओ निगमंमि गहियवक्को य । बहुमित्तो य पिया ते, सामिणि ! नगरस्स य पहाणो ॥ तत्तो उ अविणयमिणं गुणबुद्धि तुहोवरि विहेही [सो] । मज्झ य करेही रुट्ठो, सो सव्वकुलस्स उवघायं ॥ ता तं जाव न नज्जसि, ताव नियत्ताहि निययघरमेव । अहयं काहामि तहा, जह लेज्जं तुममुवाएणं' ॥ एयंमि देसकाले, केण वि पुरिसेण रायमग्गंमि ।। पढिया वच्चंतेणं, गाहा ण(प?)गुणा इमा घरिणि ! ॥ 'सयमागया पिया जोव्वणं च अत्थो य रायलच्छी य । वाससमए पय(ढ)मजोण्हा, पंच वि तुरमाणा भोइज्जाउं(भोज्जउ?)' ॥ सोउं चेमं गीयं, सोच्छाहो घरिणि ! मं पिओ भणइ । 'देसंतरंमि गंतुं, पिए ! जइ वरं रमिज्जामो' ॥ तो तं बेमि रुवंती, - 'नऽम्हि समत्था नियत्तिउं गेहे । अणुगामिणी अहं भे, जत्थ भणह तत्थ वच्चामि' ॥ दायं(एं)तो य अवाए, बहुए वि ममाऽइनिच्छयं नाउं । 'वच्चामो'त्ति पवज्जिय, भणइ - 'गिण्हामि पाहेज्जं ॥ पंथपरिव्वयहेउं', जाव य सो गेहमइगओ निययं । ताव मए सारसिया-ऽऽभरणाणयणाय पट्टविया ॥ सा वि गया जा तुरियं, तायगिहतरगयं [नियं] भवणं । रयणकरंडयहत्थो, पिओ वि मे आगओ ताव ॥ तमहं बेमि सविलया, - 'आभरणाण विसज्जिआ मए चेडी । सा जाव तओ आवइ, ताव मुहुत्तं पडिक्खामो' ॥ सो भणइ - 'मंतभेओ, होई उ होज्ज; कीस सा मुक्का ?। गहियं च मए वित्तं, सव्वाभरणं ति वच्चामो' ॥ तस्स य छंदमणुयत्तमाणाऽहं अपडिच्छियसारसिया । तुरियं संप[त्थियाऽहं, निग्गया स]पिया घरिणि ! ॥ तो सव्वरत्तिजणहिंडणेण नगरिं अवंगुयदुवारं । दटुं निग्गच्छामो, तत्तो जउणग्गमोइण्णा ॥ अह तत्थ नियच्छामो, नावं खीलंमि रज्जुपडिबद्धं । लहुयं गमणसमत्थं, विच्छिण्णाठिंडकुच्छीयं ॥
