________________
[२२०]
पस्सामि चेडियं तं, [गहिऊण] भिसिणिपत्ततोएणं । महहिययभागमंसूणि, फुसिय रोवंतियं च सयं ॥ उठेऊण य तत्तो, तप्पउमसरंतियं कयलिसंडं । अहमागया तर्हि पि य, विमलंमि ठिया सिलापट्टे ॥ तो भणइ चेडिया मं, - 'सामिणि ! साहाविएण व समेणं । डसियवसेण व केणइ, तुममेवं मुच्छिया सहसा ॥ साहसु मे जं जायं, जेण लहुं किज्जए पडीयारो । मा कालविलंबेणं, होज्जऽवयारंतरं किंचि' ॥ भणिया य मए एसा, - 'नाऽजिण्णाईणि'; तो भणइ चेडी । 'जइ एवं ता साहसु, सब्भावं'; तो मए भणियं ॥ 'जइ कस्सइ कहसि तुमं, महकहियं ता विहेसु सहि ! सवहं । महजीवियदाएणं, जेणाऽहं तुज्झ साहेमि' ॥ एवं च मए भणिया, सारसिया भणइ पायवडिया मं । 'जह भणसि तह काहं, सामिणि ! साहसु रहस्सं' ॥ वोत्तुं चेमं तीए, सुणणत्थं दुक्कडोवविट्ठाए । बाहोल्ललोयणाऽहं, सोयविसण्णा परिकहेमि || 'अंगा नाम जणवओ, चंपाउरिसिंगओऽत्थि सहि ! जस्स । अंगेसुत्तुंगपुलिणा, विहंगसंगा(घा?)उला गंगा ॥ तंमि सहि ! चक्कवाई, अणंतरभवे अहं इओ आसि । तत्थ वि माणुसजाइं, सरामि तयणंतरं पत्ता ॥ आसी य सहयरो मे, [चक्काओ तेण] सममइपसत्ता । सविलासं छप्पि रिऊ, माणेमि समं तओ तत्थ ॥ अह अन्नया कयाई, नाणासउणगणमिहुणमज्झगया । भागीरहिजलपट्टे, रमिमो मणिकोट्टिमनिभंमि ॥ एयंमि देसकाले, एक्कल्लओ तत्थ मज्जओ एइ । हत्थी मयविसवियलो, सूरायवसोसियसरीरो || सो मज्जिय-निव्वाओ, उत्तिण्णो अप्पणो कमेण करी । मइ(य)जीवियनिव्वाहो, [वाहो] य तहिं समणुपत्तो ॥ दटुं च तं गयवरं, सो वाहो हत्थिदुग्गमे देसे । थोरं कंचि उवगओ, नईतडवयंसयं रुक्खं ॥ पासल्लियदिटीओ. तत्थ चडावियपचंडकोदंडो । सगुणं कुणइ हयासो, वणहत्थिविणासणं कंडं ॥ तेण य विचालगामी कालहवि(कालहत्थेण व?) सहयरो मज्झं । विद्धो कडिप्पएसे, बुद्धो य गओ गओ तत्तो ॥
