________________
[२१९]
ताएणं आणत्ता, नियपुरिसा जह - 'करेह सामग्गि । कल्लुज्जाणियहेडं, महिलाणं' तेहिं वि पत्ता ॥ धाईएँ अहं भणिया, – 'सज्जं ते जिमणं; तुमं पुत्ति ! । एहि य बइस भुंजस', भुत्ता य अहं: तओ सरे ॥ अत्थमिए कयकिच्चा, चेडीहिं जिणघरे पणमिऊण । राईभोयणविरई, कासीय पडिक्कमणयं च ॥ सुत्ता य पुणो गोसे, कयकिच्चा वंदिऊण जिण-साहू । संखेवपडिक्कंता, उववणगमणुस्सुया अहयं ॥ सूरुग्गमंमि य तओ, महिलासु निमंतियाऽऽगयासु गिहे । परिसच्चियनिग्गमणा, उज्जाणे पत्थिया अम्मा । तत्तो तं निग्गमणं, कहियं मे उवगयाहिं चेडीहिं । सद्देउं मं तत्थाऽऽगयाहिं अम्मनिग्गमणं ॥ अहयं पि सहीहिं समं, कमेण मज्जिय-पसाहिया घरिणि ! । सुमहल्लयमारूढा, कयसंजुत्तं पवरजाणं ॥ धाई य उवारूढा, सारसिया चेडिया य मे जाहे । ताहे य पट्ठियं तं, महाविमद्देण य पहुत्तं ॥ तं उज्जाणं तत्तो, जाणेहिं समारुहंति विलयाओ । अहमवि उप्पत्तइया, ओइण्णा निययजाणाओ ॥ रुंजंति पुप्फगोच्छे, वच्छाणं तत्थ महिलियाओ य । पल्लव-गोच्छधराणं, पेच्छंतीओ उववर्णमि ॥ 'एएह सत्तिवण्णं, दच्छामो तंति तो भणइ अम्मा । 'पुप्फेहिं सूइओ जो, सरतडजाओ'त्ति कण्णाओ ॥ तो सो जुवइपहकरो, पल्लावील्लीए तत्थ संपत्तो ।' अहमवि समल्लीणा, सारसियाचेडियासहिया ॥ तं सत्तिवण्णरुक्खं, रम्मं पेच्छामि तत्थ हिंडंती । पउमसरुड्डीणाणं, जं वेडं छप्पयगणाणं ॥ ताहिं च महिलयाहिं, लुत्त-विलुत्तं तु फुल्ललोलाहिं । तं पिच्छिऊण सुइरं, पउमसरं मे गया दिट्ठी ॥ रम्मंमि य तंमि सरे, सहयरीसंजोगरागरत्तो(त्ते) व्व । घरिणि ! बहुचक्कवाए, मणोसिलापंजरे पेच्छं ॥ दटुं च बंधवे विव, ते हं चक्कायए तर्हि घरिणि ! । सरिऊण पुव्वजाइं, सोएणं मुच्छिया पडिया ॥ संपत्तचेयणा पुण, सोयावेसेण विसमकयसासा । माणसदुक्खक्खणियं, बाहं बहलं च मुंचती ॥
