Page Text
________________
[२१०]
तओ मिलिएसु [स]व्वेसु बलेसु कूणियस्स कालो दंडनायगो पहरंतो सम्मुहमागओ चेडयबलस्स । चेडएणाऽवि '[ए]गो चेव मए बाणो जावज्जीवं कजंमि निच्चं मेल्लियव्वो'त्ति कयाभिग्गहेण मुक्को कालस्साऽभिमुहममोहबाणो । विणासिओ य तेण कालो । तओ भग्गं कूणियबलं । पडिनियत्ता सए सए आवासे गया । एवं दसहिं [बाणेहिं] दस वि मारिया चेडएण कालाईया तओ 'संपयं मम वारओ'त्ति चिंतित्ता एगारसमे दिवसे कूणिओ अट्ठमभत्तं गेण्हइ । तत्थ य सक्कजीवो कत्तियभवे गिहत्थमित्तो चमरजीवो य पूरणभवे तावसमित्तो कूणियजीवस्साऽऽसि त्ति तदंतियमागया सक्क-चमरा । तेसिं पि सक्केण 'सुसावओ चेडओ, ता नाऽहं तं पहरामि, किंतु तुमं रक्खिस्सं'ति [भणिए, 'अहं तुह साहेज्जं करिस्संति] वोत्तुं नियत्तो चमरो ।
तेणाऽवि दोसु वि बलेसु संगामत्थमुवट्ठिएसु उदाय(इ?)हत्थिवरारूढस्स कूणियस्स पुरओ विउव्वित्ता अदिस्समाणं महासिलं पारद्धा महासिलाकंटओ रहमुसलो य नाम संगामा । तेसु वि जस्स देवसत्तीए सत्तुजणस्साऽऽसो वा, हत्थी वा, जोहो वा; तणेण वा, कटेण वा, पत्तेण वा, सक्कराए वा अभिहओ; 'महासिलाए चूरिओ, महाकंटएण य विद्धो अहं'ति मन्नइ सो महासिलाकंटओ नाम संगामो । मया य एत्थ चउरासी मणुस्सलक्खा । जत्थ उण देवसत्तीए नरा-ऽऽसरहिओ फिरंतो रहो समुसलो सत्तुसेण्णसंहारं करेइ सो रहमुसलो नाम संगामो । मया एत्थ वि चउरासी मणुस्सलक्खा । जम्मज्झे य वरुण-सोहिय त्ति ॥छ। वरुणसोहियकहा भण्णइ -
__ अत्थि रायगिहे नाग-सुलसाणं पोत्तओ वरुणो नाम महाजोहो परमसावओ । सो जावज्जीवं कयाभिग्गहेण छटुं छद्वेण पारेइ । पियबालवयंसो य से सोहिओ नाम जोहो । ते य दो वि हल्लविहल्लसेवग त्ति ठिया तेहिं सहाऽऽगंतुं वेसालीए । निउत्ता य तेहिं रणत्थं रहमुसलसंगामे । तंमि य विहियअट्ठमभत्तो गहियसन्नाहाउहो य रहवरमारुहित्ता 'न मए [दु]क्को एयपढमं पहरियव्वो' त्ति कयाभिग्गहो पविट्ठो जाव वरुणो ताव पडिगएणाऽऽगओ एगो सत्तुजोहो तं भणइ - 'पहरसु भो !' । वरुणो भणइ - 'नियमो मे पढमपहारे । ता तमं चेव पहरस' । सोउं चेमं कविओ सत्तजोहो कट्रिया(त्ता) य बाणेण गाढप्पहारीकरेइ वरुणं । तओ सो कुविओ बाणेणं विणासित्ता तं सत्तुजोहं, वालित्ता घायपीडिओ त्ति तुरए, निग्गओ संगामाओ । गओ सुद्धं थंडिलमेगंते नियरहाओ उत्तरइ । तुरए मुंचइ । दब्भसंथारयं रएइ । पडेणोच्छाएइ । तदुवरि च पुव्वाभिमुहो पच्चासणेणुवविसित्ता सीसे कयकरंजली भणइ - 'नमोऽत्थु णं नमो अरहंताणं भगवंताणं जाव संपत्ताणं । नमोऽत्थु णं समणस्स भगवओ महावीरस्स आइगरस्स जाव संपाविउकामस्स मम धम्मोवएसयस्स । पडिवन्नो य मए पुट्वि सामिसमीवे सावयधम्मो । संपयं पुण तस्समक्खं पिव सव्वविरओऽहं सव्वं वोसिरामि'त्ति । काउं चेमं मुक्कसन्नाहो जा सल्लं कड्डेइ ताव समाहित्थो वरुणो मओ । जाओ य सोहम्मे कप्पे अरुणाभे विमाणे चउपलियाऊ देवो । तओ चुओ महाविदेहे सिज्झिहि त्ति ॥छ।
वरुणपियवयंसो य सोहिओ संवाहित्ता पविट्ठो रहमुसलसंगामे । पहरंतो य तत्थेगेण सत्तुणा गाढप्पहारीकओ । सो वि सरहं वालित्ता वलंतो वरुणो दिट्ठो जेणाऽऽसि तं मसाणं गओ वरुणंतियं । दटुं च तं कालगयं रहुत्तिण्णो तुरए मोत्तुं संथारिय केवलपडोवरि वरुणो व्व पुव्वाभिमुहो पच्चासणीयंजली य होउं भणइ - 'वरुणमित्तेण जा काइ कया चरिमाराहणा सा ममाऽवि होउ'त्ति । तओ मुक्कसण्णाहो
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |