Page Text
________________
[२०९]
हिंडिउमारद्धा ।
अन्नया य कहि(ह)चि पमत्ताए दिन्नं पुणो वि गोउलिणीए सविसं दहियं । तं चोवजीवित्तु पीडिओ महारिसी दाउं सिद्धालोयणं जाव भत्तं [पच्च]क्खाइ ताव परिणयं विसं । तओ पालिय तीसं दिवसाणि जावाऽणसणं संपत्तकेवलो सिद्धो भगवं । एत्यंतरंमि य दिण्णोवओगा कुविया खेत्तदेवया । तीए य महापंसुवुट्ठीए उद्दहियं सव्वं पि सजणवयं वीयभयं नयरं । ठिओ य सेज्जायरकुंभारस्स भगवं गिहे जस्स [सो] रिसिभत्तो त्ति समुद्धरिओ य देवयाए । नेउं च सिणपल्लीदेसे ठविओ जट्ठाणे तत्थ कुंभारपक्खेवो नाम पट्टणं जायं ।
___ इओ य अभीइकुमारो वि उद्दायणपव्वयणकाले मज्झरत्ते चिंतेइ जहा – 'पभावईकुच्छिसंभूओ अहं उद्दायणस्स जेट्टपुत्तो वि होउं न तेणाऽहिसित्तो रज्जे । ता किं चिट्ठिएणं ?'ति दुक्खाभिभूओ सो निग्गंतुं वीयभयाओ गओ चंपाए । तत्थ य माउसियाउत्तो त्ति सम्माणिओ कूणिएणोद्दायणोवरि साणुसओ चेव ठिओ सुहंसुहेण । एवं चाऽभीइकुमारो बहुवरिसाणि य पालियसावयधम्मो वि तहा पज्जते कयद्धमासाणसणो विहिणाऽऽलाइऊणोद्दायणाणुसयं मओ समुववण्णो पलिओवमठिईओ असुरकुमारो । तओ य उव्वट्टो महाविदेहे सिज्झिस्सिहि त्ति ॥छ। उद्दायण-पभावइ त्ति गयं ॥छ।।
पभावईभाणिज्जयकूणियभायरो हल्ल-विहल्ला सेयणएण गंधहत्थिणा समं सभवणेसु पुक्खरिणीसु य अभिरमंति । सो वि हत्थी अंतेउरियाओ तेसि रमावेइ । ते य पउमावई पेच्छइ नयरमज्झेणेत-जंते हल्लविहल्ले देवदूस-हार-कुंडलविभूसिए गंधवरहत्थिगए सेयणओ गंधहत्थी' । एवं च पुणो पुणो तोरविज्जंतो पउमावईए कोणिओ हल्ल-विहल्ले भणावेइ - 'समप्पित्ता मम सेयणयं गंधहत्थि तुब्भे सुहंसुहेण लभह(भमह)'। तेहिं भणिअं - 'ताएण दिण्णो । एयंमि को तुहाऽहिगारो ?' तओ ते वि विसेसेण समच्छरं कोणियं नाउं नासित्ता सेयणयसहिया मायामहचेडयसरणत्थं गया वेसालीए । तं च नाऊण चेडयस्स कोणिएण पेसिओ दूओ । भणावियं च – 'हल्ल-विहल्ले पट्ठवेहि' । चेडएण भणियं – 'तुमं पि दोहित्तओ, तहा एए वि । ता को मम विसेसो ? न य सरणागयाण समप्पणं सुपुरिसेहिं कीरइ' । तओ पडिगओ दूओ। कहियं कोणियस्स । तेणाऽवि पुणो वि पट्ठविओ दूओ, भणावियं च – 'विसज्जेह ते । अह न विसज्जेह ता जुज्झसज्जा होह' । तओ भणावियं चेडएण – 'न विसज्जेमो । कुणसु जं ते रुच्चइ' ।
तओ कोणिएण कालाइया दस वि आवाहिया । तेसिं च एक्कारसण्हं वि पत्तेयं तिण्णि [तिण्णि] हत्थि-रहा-ऽऽससहस्साणि तिण्णि तिण्णि मणुयकोडीओ । बलं नाउं चेमं चेडएण वि मेलिया अट्ठारस गणरायाओ । तेसिं च एगूणवीसाए पत्तेयं *तिण्णि हत्थि-रहा-ऽऽससहस्साणि तिण्णि य मणुयकोडीओ बलसंखा । संपत्ते य सबले कूणिए सम्मुहीहूओ सबलो चेडग त्ति ।
एत्थंतरंमि य कूणिएण सह वेसालीए गएसु कालयाईसु तम्मायरो कालाइनामिगाओ रायगिहे समोसरियं पुच्छंति महावीरं - 'भगवं ! किमम्हाणं पुत्ता संगामाओ वलिस्संति न वा ?' भगवया वि 'तत्थेव तेसिं खओ'त्ति कहिए सव्वाओ वि ताओ पव्वइयाओ त्ति ।
* तिण्णि तिण्णि हत्थिसहस्साणि तिण्णि तिण्णि रहसहस्साणि तिण्णि तिण्णि अस्ससतसहस्साणि इति पाठः
आवश्यकचूर्णी।
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |