________________
mmmmmmmmmmmmmmmmmmmmmmmmmmmmmmmmm
पियदंसणा वि भाविय-जिणवयणा कहमकारणा जीयं । उज्झिहिइ पुव्वदुच्चरिय-कम्मविवागं वियाणंती ॥ अन्नं च इमी[ए] फुडं, [कहियं चेव] नेमित्तियपहाणेण । जायसुआए चरित्तं, तं पि य कहमन्नहा होही ?॥ ता जुत्तमियाणि मे, एयं जमिय(ओ) पुरं समभिगंतुं । घेत्तूण दव्वजायं, [जायं] मोएमि सयराहं ॥ अहवा कहं इयाणिं, रहिओ विहवेण तत्थ वच्चामि ?। दुज्जणहिययाणंद, वसणं संपाविओ विहिणा ॥ कोसंबि पि न जुत्तं, गंतुं पियदंसणाए रहियस्स । तो माउल[स्स] पासं, तुरियं वच्चामि वेसालि ॥ तं च मग्गित्तु दव्वं, भिल्लेहितो विमोइउं तीए । पियदंसणाए सहिओ, गच्छिस्सं नवरि नायरिं ॥ गंतूण य नायउरिं, माउलयस्साऽवि थेवदियहेहिं । केणइ ववएसेणं, पेसिस्सं दव्वजायं ति' ॥ इय चिंतिउं पयट्टो, पुव्वाभिमुहं तु गुरुजणं जंतो । बीयदियहमि पत्तो, गिरिथलयं नाम थाम ति ॥ कयभोयणोवयारो, पंथब्भासंमि तत्थ जक्खहरे । वीसमइ जाव थेवं, वेलं बहुरुक्खछन्नंमि ॥ पत्तो य ताव एक्को, पहिओ जक्खालयं दढं खिन्नो । नमिऊण माणिभदं, सो वि य तत्थेव उवविट्ठो ॥ वीसमिओ य मुहत्तं, वीसमिएणं च बंधुदत्तेणं ।। अह पुच्छिओ य - 'सुंदर !, कत्तो एत्थाऽऽगता तुब्भे ?' || तेण विय सबहुमाणं, 'वेसालीओ'त्ति कहियमच्चत्थं । परिओसवियसियच्छं, पुणो वि सो पुच्छिओ तेण ॥ 'किं तत्थ वसह तुब्मे?, कि वा अन्नत्थ कारणेणं वा । कह वि गया वेसालि ?', 'तत्थ'त्ति य तेण सिटुंमि ॥ भणिओ अह बंधुदत्तेण - 'सत्थवाहोऽत्थि तत्थ धणयत्तो । तं किं जाणह तुब्भे ?', 'बाढं'ति य तेण भणियंमि ॥ दि(हि)टेण बंधुदत्तेण, सो तहिं पुच्छिओ य नेहेणं । 'कुसलं तस्स ?'त्ति तओ, जाओ नवरं सतुण्हिक्को ॥ भणिओ य बंधुदत्तेण, – 'कीस तुण्हिक्कओ तुम जाओ? । धणयत्तस्स पउत्ति, पुच्छियमेत्तो ससोगो य?' || दीहं नीससिऊणं, भणियं पहिएण दीणवयणेण । 'न हु परवसणं तीरइ, वोत्तुं मोणं ठिओ तेण ॥
