________________
[४]
ता पट्टवेमि सिग्घं, सयमवि वच्चामि रण्णमझमि । किं जंपिएण बहुणा?, सिग्धं मेलेमि तं तस्स ॥ ता कुणसु पाणभोयण-गहणं साहारणं सरीरस्स । न हु तेण विणा मज्झ, गिहाउ तुह गमणमत्थि त्ति ॥ गोत्तंतेहि य सुंदरि !, पाविज्जइ सो कयाइ बहुएहिं । दियए(हे)हिं भयपणट्ठो, तहा वि खेओ न कायव्वो' ॥ ‘एवं' ति य पडिवन्ने, पट्ठविया तेण दस दिसिं पुरिसा । तस्स गवेसणहेउं, कयं च रित्थं पि एगत्थ ॥ इयरो वि बंधुदत्तो, सत्थंमि विणिज्जियंमि वेगेण । तत्तोऽवक्कमिऊणं, पत्तो हिंतालतरुसंडं ॥ परिचिंतिउं पयत्तो, – 'पेच्छ मह पावपरिणइवसेण । सुकलत्तसंपओगो, सोयामणिसन्निभो जाओ ॥ पियदंसणा इ(य) नूणं, पाणे न धारेइ मह विओयंमि । अमुणियविरहपओगा, विसमं वसणं च संपत्ता ॥ किं जीविएण मज्झ वि, दीसइ जो एस सत्ति(त्त)वन्नतरू । तम्मि ठिओ य विसन्नो, अहमुक्कलंबेमि अप्पाणं' ॥ इय चिंतिउं पयट्टो, नवरं तस्संतिए तरुस्सेसो । पेच्छइ नाऽइदूरे, महासरं नलिणिसंछण्णं ॥ दिट्ठो य तत्थ एगो, कलहंसो तेण पिययमारहिओ । विरहानलसंतत्तो, कामावत्थेहिं झीणतणू ॥ तं पिच्छिऊण चिंता, जाया सत्थाहिवस्स - ‘एसो वि । पियविप्पओगदुहिओ, विहिणा विणडिज्जइ वराओ' ॥ इय चिंतागयचित्तो, दुहिए सत्थाहिवंमि कलहंसो । पत्तो परिब्भमंतो, सरंमि एक्कं सरुद्देसं ॥ अह निययविप्पणट्ठा, वियर्ड भमिऊण सरवरं तत्थ । कुवलयछायाएँ ठिया, दिट्ठा कलहंसिया तेण ॥ विरहपरिदुब्बलंगी, असमत्था कूविउं पि सोएण । दट्ठण य तं हंसो, धणि परिओसमावण्णो ॥ दट्ठण य पियजाया-घडियं कलहंसयं विहिवसेण । सत्थाहिवस्स तओ, मणमि चिंता समुप्पन्ना ॥ 'एवं जीवंताणं, कालेण कयाइ होइ संपत्ती । जीवाण; मयाण पुण, कत्तो दीहंमि संसारे ?॥ पाणेसु धरतेसु य, नियमा उच्छाहय(स)त्तिममुयंतो । पावेइ फलं पुरिसो, नियववसायाणुरूवं तु ॥
