________________
[१८६]
रक्खवालेहिं पोक्कारिय'मेसो मियपुच्छमंसहारओ चोरो चोर'त्ति रक्खित्ता निवेइअं रण्णो । भणियं च तेण - ‘मा पेच्छा भज्जउ । एयसारअंतोगमणं(?) क(का)हामि' ।
तओऽहं मगहसेणापडिबद्धमाणसो चिंतेमि – 'पेच्छामि ताव मगहसेणं नच्चमाणि' । तओ हं गओ रंगं । तत्थ य पेच्छंतस्स मम चारुनच्चणयं वोच्च(पेच्छिउं?) मगहसेणाए मगहाहिवेण नच्चणपरितोसिएण संलत्तं - 'मगहसेणे ! साहु साहु नच्चियं । ता वरं वरेहि' । तीए संलत्तं - 'महाराय ! अच्छउ ताव तुब्भं सगासे । जया [मग्गेमि तया] देज्जह' । मन्निउं चेमं रण्णा पुणो तीसे संगीय-नट्टतोसिएण दिन्नो बीओ वरो । धरिओ तहेव सयासे । तओ पुणो वि नट्टकरणपरितोसिएण दिन्नो तइओ वरो । एत्थंतरंमि य मगहसेणाए लद्धतिविहप्पसायाए मम गवेसणानिमित्तं उग्गीयमिमं उल्लवंतीए -
'कहिं सो मिगमंसहारओ ? मज्झं जीवियदायओ पिओ ? । चूडा[मणि] मज्झ गिण्हिया
चिट्ठइ ? मं साहेउ संपयं' ॥ मया भणियं - 'अहं सो मियमंसहारओ
तुझं जीवियप्पदायओ [पिओ] । [चूडामणिं तुज्झ गिण्हिया]
पासओ चिट्ठइ जीव तं चिरं (?)' || तीए भणियं - 'जइ तुमं मंसहारओ
मझं जीवियदायओ पिओ ।
चूडामणि मज्झ गेण्हिया चिट्ठसु संगोवि[ओ] संपयं ॥ जओ रम्मे नर-नारिसंकुले रायगिहे सपहे महालए । मत्तेण गएण भेसिया
तेण विउत्तो मे तमेच्चिरं' ॥ तओ णाए मगहाहिवो विण्णविओ जहा - 'जोणओ नामेस सामिस्स सं[प]यं तक्करो, परं विज्जाहरहीरंतियाए तेण जीवियं दिन्नं । ता सामि ! एक्कंमि वरे तुब्भे एयस्स अभयं देह । बीए वरे एस चेव मे पइ त्ति । तइए(ओ) पुण वरो तुब्भमेव सगासे अच्छउ । जाहे मग्गेमि ताहे देज्जाह' । राइणा पडिवन्नं । तओ मगहसेणा सललियं नच्चिऊण परितोसियरंगसमूहा रायाणुण्णाया ममं गहाय निययभवणं गया । तत्थ य अहं तीए सद्धि एगंतरइपसत्तो पइदिणं परिवड्डमाणसिणेहो सुहंसुहेण अच्छामि ।
तओ कुओ वि कालाओ भणियं मए – 'मगहसेणे ! वच्चामि उज्जेणि' । सा भणइ – 'तुब्भे तत्थ जंता कस्सेह संमिलिस्सह ? ता ममं पि गिण्हिऊणं वच्चह' । तओ मया संपडिवणं । तओ मगहसेणा सललियं उत्थिय गया मगहाहिवसमीवं । विण्णविअं च णाए – 'सामि ! जो मे तइओ वरो
