Page Text
________________
[१८१]
सुव्वयकहा भण्णइ -
इहेव जंबुद्दीवे भारहे वासे अंगाजणवए पच्चंतगामो बहुगामहिमाउलो वयग्गामो नाम । तत्थाऽहं मयहरपुत्तो सुव्वओ नाम । भद्दा मे भज्जा । अण्णया य तंमि गामे चोरधाडी पडिया । तेहिं सो गामो विलोलि(वि)ओ । मणुस्सा भएण नट्ठा । अहं पुण एगत्थ निलुक्को अच्छामि । तओ सा मे महिला ते चोरे पलोएइ । अवि य -
गेहंमि डज्झमाणे, [बाहिं] निग्गया भणइ [सा] बाला ।
'हो दढमूढा ! तुब्भे, महिलाउ न लेह वंदंमि ?' ॥ सोउं चेमं तेहिं 'सा इच्छइ'त्ति नाऊणं नीया चोरपल्लिं । समप्पिया सीहपल्लवइस्स । तेण सा रूववइ त्ति काउमत्तणो भारिया कया ।
इओ अहं सयणेण बहुसो भण्णामि – 'कीस तुमं महिलं वंदाओ न मोएसि ? अहो निरुच्छाहो!' । तओऽहं तेहिं तोरिज्जमाणो गओ कालजिब्भं नाम तं चोरपल्लिं । तत्थ य सुमित्ता नामोलग्गिया मए थेरी। सा भणइ – 'पुत्त ! संदिससु जं मया करणीयं' । भणिया य मया - 'अम्मो ! मम महिला एत्थ बंदिया आणीया । किर सा पल्लीवइणा भारिया कया । तीए विरहे परिकहेहि जहा – तुज्झ कारणे भत्ता तुहेहाऽऽगओ चिट्ठइ' । तीए गंतूण कहियं । तो सा भणइ - 'अज्ज चोराहिवो पवसिउकामो । तंमि निग्गए तुम एज्जसु' । तओ हं विगाले गओ तीए सगासं । दिट्ठा य सा भणइ - 'सोहणं तए कयं जमागओ। उवविससु इमीए सेणावइसंतियाए सेज्जाए' । तत्थ य ममोवविट्ठस्स निव्वत्तियं पायसोयं ।
सो य सेणावई अवसउणिओ त्ति काउं नियत्तो सगिहमागओ । तओ णाए संभंताए सेणावईसंतियाए पट्टा(खट्टा)ए हेट्ठाऽहं पवेसिओ । सेणावई य तंमि चेव सयणीए सण्णिसण्णो । थोववेलाए य तीए सेणावई भणिओ - 'जइ सो मज्झ भत्ता एज्ज तो तुमं किं करेसि ?' सेणावई भणइ – 'तुमं सक्कारिऊणं तस्स समप्पेमि' । तीए भिउडी कया । तओ सेणावई भणइ - 'जइ पेच्छामि तो तं बंधावेमि' । ताहे सन्निओ जहेसो हेट्ठा खट्टाए अच्छइ । तओऽहं तेण बालेहिं कड्डिऊण अल्लवद्धेहिं हूडिओ मज्झिमथूणाए। तओ तेसु पसुत्तेसु मम भवियव्वयाए वद्धगंधेण सुणओ समागओ । तेण सा वद्धा खइया । तओऽहं छुट्टो बंधणाओ। तओ मया सेणावइसंतियं असिं कड्डित्ता घाइओ चोरसेणावई । सा वि मए बालेसु कड्डित्ता भणिया - "जइ पुक्कारिस्ससि तओ ते सीसं छिदिस्सामि" । सा तुण्हिक्काविया ।
तओऽहं तं घेत्तूणं निग्गओ पल्लीओ । सा वि निज्जमाणी पंगुरणस्स दसियाओ मग्गे विक्खेरेइ । तओ मए राईए दूरं नीया एगाए वंसजालीए पविट्ठा 'दिवसं लंघेमो राईए वच्चिस्सामो'त्ति बुद्धीए । इओ य पभाए वाहरा निग्गया । तेहि य जोयंतेहिं सव्वओ वंसजालित्था दिट्ठा अम्हे । तओ य घेत्तुं पहारसंभंतगत्तो कओ । पच्छा हत्थ-पाएसु सीसे य पंचहिं खाइरखीलेहिं खीलित्ता मुक्को । ततो तं महेलं घेत्तूण पडिगया पल्लिं ।
इओ य एगो वानरो परिहिंडतो तप्पएसमागओ । सो ममं पासिऊण मुच्छिओ । थोववेलाए य समासासिओ । तओ तुरियं उद्वेऊण अवक्कंतो । नाइ निरस्स(नाऽइवेलाए नियत्तो?) पउमिणिपत्तत्थउदगं दो य ओसहीओ घेत्तूणं । तओ ताण सल्लुद्धरणी सिलायले उदगेण पीसिऊण मम पंच वि खीलियगत्ताणि
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |