Page Text
________________
[१५७]
तत्थेव धणवज्जो नाम सेट्ठी । तस्स पउमसिरी नाम भज्जा । तीए वसुदत्तो नाम पुत्तो । मओ य धणवज्जो, परिक्खीणविहवो । पउमसिरी वसुदत्तं बालगं घेत्तूण गया सिरिउरं नाम नयरं । तत्थ य ठिया सेट्ठिघरमेगं करेइ जणकम्मं । लाइओ य [वसुदत्तो] वच्छवालगो । तेण य बाहिं हिंडमाणेण कयाइ तवसुसियदेहो दिट्ठो महातवस्सी । सो य संजायउल्लासेण वंदिओ परमभत्तीए । ठिओ य थेवं वेलं तं पज्जुवासेंतो । तओ गओ सगिहं ।
इओ य तंमि चेव नयरे जाओ को वि ऊसवो । सिज्झइ य तंमि घरे घरे खीरी । भुंजइ य गुल-हियाइसंजोइयं लोगो खीरिं । तं च दट्ठण संजायसद्धेण वसुदत्तेण भणिया माया - 'अम्मो ! ममाऽवि अज्ज खीरिभोयणं संपाडेहि' । तओ तं सोऊण खीरिसामग्गीरहिया पउमसिरी वि रोविउं पवत्ता । तओ समागयाओ पाडिवेसिणीओ पुच्छंति निब्बंधेण - 'किमेयं रुव्वइ ?' तओ तीए कहिए खीरित्तंते कया ताहि खीरिसामग्गी । रंधिया य थेरीए खीरी । तओ पहावित्ता भोयणत्थं बइसारिओ वसुदत्तो । दिन्नं पुरओ थारं(लं) । भरियं खीरीए पक्खित्तं च पउरं गुल-हियं । तओ रत्थ(वत्थ?)संवरणत्थं पविट्ठा घरमज्झे थेरी । ___एत्थंतरंमि य मासोववासिओ पारणत्थं तत्थ समागओ सो खमरिसी । दिट्ठो वसुदत्तेण । चिंतियं च - 'अहो ! [अज्ज] [मह]रिसिदाणेण धम्ममुवज्जेमि' । तओ थालमुप्पाडिऊणुट्ठिएण देंतेण - 'मा माया भणिही - बहुं दिन्नं'ति संकाए पक्खित्तो खमरिसिपत्तंमि खीरितिभागो । तओ पुणो [चिंतिउं 'थोवं' ति बितिआ तिभागा दिण्णा । तओ पुणो] वि चिंतियं – 'जइ एयस्स मज्झे अण्णं किं पि अंबखलिगाइ पडिस्सइ तो सव्वं पि विणस्सिस्सइ । ता भरेमि पत्तमिमं'ति । तओ पक्खित्ता सव्वा वि थालखीरी ।
___ एत्थ य पढमं निविभागदाणत्थमुक्खित्ता खीरी । पच्छा य सा जहा दोहिं अदाणभावेहिं तिभागीकया तहा तद्दाणावज्जियं पुण्णं पि दोहिं विग्घेहिं तिभागोदयं होही । तप्पढमपरिणामो य देवाउजोग्गो त्ति निबंधइ जा देवाउयं च वसुदत्तो ता विनिग्गओ खमरिसी । तओ घरमज्झाओ नीसरिया पउमसिरी । पेच्छित्ता य रितं थालं चिंतेइ – 'अहो अइभुक्खिओ मम पुत्तो जं जेमिया झड त्ति खीरी' । तओ पुणो वि भरियं थालं । भुत्ता य तेण अइरंकत्तणेण आकंठप्पमाणा खीरी । तओ वच्छए घेत्तूण चारणत्थं गओ बाहिं । झोडिओ य तत्थ देव्वजोगेणं झडीए । तओ जाया विसूइया । मओ य देवलोगं गओ ।
____ तओ चुओ रायगिहे नयरे धणसत्थवाहस्स सुंदरस्स भद्दाए कुलवईए भारियाए उवाइयसएहिं संभूओ गब्भे । भणइ य लोगो - 'कयपुण्णो एस जीवो जो एईए गब्भे उववन्नो । तओ जायस्स तं चेव कयउण्णो त्ति नामं तस्स पइट्ठियं । तओ वड्डिओ सो देहोवचएणं कलाकलावेण य । परिणाविओ समाणरूव-लावण्णं कंतिमई नाम भज्जं । मेलिओ य मायाए दुल्ललियगोट्ठिल्लयाणं । तेहिं वि नीओ माहवसेणावेसाहरं । रत्तो य तीए कयउन्नो पइदिणमट्टत्तरसहस्सगहणयदाणेण तीए सह भोगे भुंजिउमाढत्तो।
इओ य असोम्माविया अम्मापियरो । भणियं सयणिज्जएहिं - 'सद्दाविज्जउ कयउन्नओ' । तओ अम्मा-पिऊहिं अइमोहओ 'मा तस्स रइभंगो'त्ति चिंतिय भणिया कंतिमई - 'पुत्ति ! जहा अम्हेहिं तहा तए वि तत्थ ठियस्सेवं कयउन्नस्स जंमग्गियं पेसियव्वं । तओ मएसु तेसु तहेव कुणंतीए कंतिमईए गयाणि[णि] बारस वरिसाणि । निट्ठियं सव्वं पि धणं । तओ गहणयमग्गणत्थमागयाए 'बहुं कालं ठिओ तत्थ कयउन्नगो । संपयं जाणावेमि'त्ति चिंतिऊण लोढणिकणयसणाहं नियाभरणं पडलियारूढं पेसियं
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |