Page Text
________________
[१४५]
Amavas
'वसंतपुरे नयरे पुन्नसेट्ठिणो दरिद्दस्स वडकुमारी दुहिया । सा य वरत्थिणी कामदेवपूयानिमित्तमारामे चोरिया[ए] कुसुमाइं उच्चिणंती गहिया मालागारेणं । तीए भणियं - ‘मा मं कुमारि विणासेसु । मए सरिसाओ नत्थि ते धूया-भगिणी-भागिणिज्जाओ ?' । तेण भणियं - 'जइ उव्वूढमेत्ता भत्तुणा अपरिभुत्ता मम समीवमागच्छसि ता ते मोक्खो, न अन्नहा' । 'एवं'ति पडिवज्जिऊणाऽऽगया निययभवणे । संपन्न(त्त)वरा य पसत्थदिवसे परिणीया सा ।
एत्थंतरंमि अत्थमिओ दिणो । उच्छलिओ तमो । उग्गओ मियंको । एसा वि पत्ता वासहरं । साहिऊण य वुत्तंतं ताए भणिओ भत्तारो - 'मए मालायारस्स वयणं पडिवन्नं, जहा - 'परिणीयमेत्ताए मम सगासे आगंतव्वं' । तं च करेमि तए पट्टविया' । तओ 'सच्चपइन्ना एस'त्ति मन्नमाणेण पट्ठविया पइणा । पंथे य वच्चंती सव्वालंकारभूसिया दिट्ठा तक्करहिं । सब्भावे य कहिए 'आगच्छंतिं मुसिस्सामो'त्ति मुक्का । पुणो अच्चंतछुहिएण दिट्ठा रक्खसेण । सब्भावे य कहिए तेणाऽवि मुक्का । तओ पत्ता आरामे । दिट्ठा मालिएण । भणियं च णाए - 'एसा सा अहमागया' । तओ 'सच्चपइन्ना महासई य एस'त्ति भातेण पाएसु निवडिऊण मुक्का मालागारेण । पत्ता रक्खससमीवं । कहिओ मालायारवुत्तंतो । तओ 'महाणुभावा एसा जा मालागारेण सयमागया मुक्कत्ति चिंतितेण पाएसु पडिऊण पट्ठविया रक्खसेण । पत्ता तक्करसमीवं । सब्भावे य निसुए मुक्का चोरेहिं पि पत्ता पइसमीवं । कहिओ सव्वो वि वुत्तंतो । तओ तीए सह विसयसुहमणुहवंतस्स वोलीणा रयणी । कयं गोसकिच्चं । उग्गए य दिणयरे सगुण त्ति पलोइया सा चेव पढमं पइणा । भणियं च -
'छंदट्ठियं सुरूवं, समसुह-दुक्खं अणिग्गयरहस्सं ।
धन्ना सुत्तविउद्धा, मित्तं महिलं च पेच्छंति' ॥ एवं च जोग्ग त्ति कया सा तेण सव्वस्ससामिणी' । 'ता कहेह भो ! तेसिं मझे केण दुक्करं कयं ?'
तओ ईसालुएहिं पिपत्ता(पिसुणित्ता?) भणियं - 'पइणा, जेण जीवियाओ वि वल्लहा नववहुया [रत्ति]वेलाए परपुरिससमीवं पट्टविया । पाणेण भणियं - 'तक्करेहिं दुक्करं कयं, जेहिं तीए वेलाए ससुवन्ना मुक्का' । छुहालुएहिं भणियं - 'रक्खसेण दुक्करं कयं, जेण अच्चंतछुहिएण वि न भक्खिया' । पारदारिएहि भणियं - 'मालागारेण दुक्करं कयं' । [तओ 'मायंगो चेव अंबयचोरो'त्ति जाणिय गहिओ अभएण सो, पुच्छिओ य - 'कहं तए फलं गहियं ?' तेण भणियं - 'विज्जाए' । तओ रण्णो सयासे उवणीओ ।] भणिओ तेण मायंगो – 'जइ परं विज्जं देसि तो मोक्खो न अन्नहा' । 'एवं'ति पडिवन्ने सीहासणठिओ सेणिओ पढिउमाढत्तो । न य ठाइ विज्जा । तओ रुटेण तज्जिओ राइणा मायंगो । अभएण भणियं – 'ताय ! न अणायरेण विज्जाभागी होज्जा । जहा तुम्हेहिं चेव विज्जाहरो'त्ति विज्जाहरकहा भण्णइ -
___ रायगिहे नयरे गुणसिलए चेइए महावीरो समोसरिओ । तत्थ य बहवे सुरासुर-सिद्ध-विज्जाहरा धम्मसवणनिमित्तं समागया । तओ धम्मकहावसाणे तेर्सि नियनियठाणेसु वच्चंताणं विज्जाहरस्सेगस्साऽणायरपरावत्तणेण गयणगामिणीए विज्जाए विसरियमेगमक्खरं । तओ हीणविज्जत्तणओ अद्धमग्गट्ठिओ आगासेणुप्पइओ वि पुणो पुणो भूमीए निवडइ ।
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |