Kahavali Pratham Paricched Part 02

SR No.: 007109
Original Sutra Author: N/A
Author: Kalyankirtivijay
Publisher: Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad
Publication Year: 2016
Total Pages: 378
Language: Sanskrit
Classification: Book_Devnagari
File Size: 13 MB

Page 156

[१३९]
अम्मापियरो तेणेव उवागच्छित्ता एवं वयासी – 'इच्छामि णं तुब्भेहिं अब्भणुण्णाओ महावीरस्स अंतिए पव्वइत्ताए' । तओ अम्मापियरो वारिज्जमाणमवि पव्वज्जाकयनिच्छयं अइमुत्तकुमारं महाविभूईए घेत्तूण जेणेव महावीरो तेणेव उवागंतुं वंदित्ता एवं भणइ – 'एस णं अइमुत्तकुमारो भविओ भीओ जम्मणमरणाणं देवाणप्पियाणं अंतिए इच्छइ पव्वइउं । ता तुज्झ सीसभिक्खं अम्हे पयच्छामो । पडिच्छंतु देवाणुप्पिया ! सीसभिक्खं' । तओ भगवं 'जुत्तं'त्ति वोत्तुं तं एवं वयासी - 'अहासुहं देवाणुप्पिया छंदेणं पव्वयाहि' ।
तए णं सो अइमुत्तो उत्तरपुरत्थिमाए दिसाए गंतुं आभरणाईणि मुयइ, सयमेव पंचमुट्ठियं लोयं करेइ । भगवं वंदित्ता पव्वयइ । एक्कारसअंगाई अहिज्जइ । _ अन्नया अइमुत्तो महावुट्ठीए जायाए कक्खाए सपडिग्गहं रओहरणं घेत्तूण बालसहावत्तणओ कीलानिमित्तं बाहिं वच्चइ । तओ *वायं वहमाणं पासित्ता मट्टियाए पालिं बंधित्ता नाविओ व्व पडिग्गहमेव नावमुदयंमि काऊण पवाहेमाणो अभिरमइ । तं च थेरा रममाणं दट्ठणाऽऽगंतुं महावीरमापुच्छंति – 'भगवं ! अइमुत्तकुमारो कईहिं भवग्गहणेहिं सिज्झिस्सइ ?' तओ भगवं वयासी - 'अज्जो ! इमेणं चेव भवग्गहणेणं सिज्झिहिइ । तं मा तुब्भे अज्जो ! अइमुत्तकुमारसमणं बालसहावगं वि अबालं हीलेह परिभवह । किंतु जहासत्तीए भत्तपाण-विणयाईहिं पडिजागरह' ।
__ तओ ते थेरा भगवया महावीरेणेवं वुत्ता समाणा अइमुत्तं भत्तीए पडियग्गंति । तओ बहूणि वासाणि परिपालित्ता विविहं काऊण तवोकम्मं संपत्तकेवलो सिद्धो अइमुत्तकुमारो त्ति ॥छ। अइमुत्तकुमारो त्ति गयं ॥छ।
किं च अइमुत्तयकुमारो व्व सयं दिक्खिओ सीसो सामिणो धणो जस्स तणओ चिलाइपुत्तो त्ति चिलाइपुत्तकहा भण्णइ -
खिइपइट्ठिए नयरे जन्नदेवो नाम बंभणो पंडियमाणी जिणधम्मं खिसइ । सो य वाए पइन्नाए गुरुवारिएणाऽवि चेल्लएण उग्गाहिऊण पराजिणित्ता पव्वाविओ । पच्छा देवयाचोइयस्स सब्भावसारं चित्तंमि साहुधम्मो परिणओ । नवरं दुगुंछं न मुंचइ । सयणिज्जा य तस्सोवसंता । भज्जा पुण नेहं न छड्डेइ । दिन्नं च परिव्वायगोवएसेणं वसीकरणत्थं तीए तस्स कम्मणं । जण्णदेवो वि कम्मणेणाऽपरिणएण मओ देवलोगे देवो जाओ । सा वि तन्निव्वेएण पव्वइया अणालोइया चेव कालं काऊण देवलोए उववन्ना । __जण्णदेवजीवो वि तओ चइऊण रायगिहे नयरे धणसत्थवाहो, तस्स चिलाइया चेडी, तीसे पुत्तो उववन्नो । नामं से कयं चिलाइपुत्तो त्ति । इयरी वि तस्सेव धणस्स पंचण्हं पुत्ताणमुवरि भद्दाए भारियाए सुंसुमा नाम धीया जाया । तीसे य सो चिलाइपुत्तो बालहारो कओ । सो य तं जोणिप्पएसे पुणो पुणो छिवंतो दट्ठण धणेण नीसारिओ गेहाओ । गओ सीहगुहं नाम पल्लिं । तत्थ य चोरसेणावई मओ । [तओ] सो चेव निमित्तं सोत्त(सोहित्तु) चोरसेणावई पइट्ठिओ । सुंसुमा य वड्डिया रूवाइगुणेहिं कलाकलावेण य जोव्वणं च पत्ता ।
अन्नया चिलाओ चोरे भणइ – 'रायगिहे धणो नाम सत्थवाहो । तस्स सुंसुमा [कुमा]रिया ।
* वायं = जलं ।