Page Text
________________
[१३३]
चिंतइ – 'किं मे भोगोवभोगसुहेणं जीसे न मे पुत्तो ? ता जुत्तं पुत्तत्थं उंबरदत्तजक्खमोवाइउं' । पभाए य तहा निवेइए सागरदत्तेणाऽणुन्नाया गहियबहुपुष्फ-गंध-मल्लालंकारा निग्गंतुं नगराओ ण्हाइत्ता वावीए कयमंगलसुवेसा गंतू[बरदत्तजक्खमच्चित्तु विहीए पायवडिया विन्नवेइ - 'जहा तए दिन्नो मे पुत्तो होइ तहा कुणसु' । गिहागयाए य तीसे सो धन्नंतरिनेरइओ संभूओ गब्भे । तइयमासे य जाओ दोहलो जहा - जइ सुहि-सयणसहिया नगरबाहिं पुक्खरिणीए मंस-सुराइखज्ज-पेज्जे[हिं] विलसामि' । तहा पुच्छित्ता पूरिए जाओ तीसे बाहत्तरिवरिसाऊ पुत्तो । सो य उंबरदत्तजक्खदिन्नो त्ति पइट्ठिओ पिउणा उंबरदत्तो नाम । तओ विजयमित्ते व्व मए सागरदत्तसत्थवाहे उज्झियगो व्व नीसारिओ उंबरदत्तो कम्मपरिणईए तहा जहा तए दिट्ठो' ।
गोयमो भणइ – 'सामि ! इओ सो कहं होही ?' सामी भणइ – 'विहस्सइदत्तो व्व संसारं भमित्तु हत्थिणाउरे कुक्कुडो गोट्ठिल्लयमारिओ तत्थेव सेट्ठिपुत्तो सोहम्मदेवो य होउं महाविदेहे सिज्झिही । जहा [सोरियदत्तो । तं जहा -
सोरियपुरे णयरे सोरियदत्तो राया । तस्स य] सोरियपुरस्स ईसाणदिसीभाए मच्छगंधपाडए समुद्ददत्तो नाम मच्छिओ । तस्स य समुद्ददत्ता नाम भज्जा । तीसे सोरियदत्तो नाम पुत्तो । समोसरियस्स य तत्थेव सोरियजक्खाहिट्ठिए सोरियवडेंसगुज्जाणे सामिस्स [भिक्खट्ठा पविट्ठो] गोयमो पुरिसमेगमट्ठिचम्मावसेसं कलुणमुक्कूवमाणमभिक्खणं पूय-रुहिर-किमिपुजं वममाणं पेच्छित्तु तहेवाऽऽगओ सामि भणइ - 'भगवं! को सो पुरिसो ?'
सामी भणइ – 'इहेव जंबुद्दीवे भारहे वासे नंदिपुरे नयरे मित्तो नाम राया । तस्स सिरिओ नाम महाणसिओ । सो य सयं बरहिय(याइ)बहुजीवखयंकरो महारोद्दपरिणामो पायं मज्ज-मंसासणेण जीवित्ता छट्ठपुढविनेरइओ होऊणिह सोरियपुरे समुद्ददत्तभज्जाए समुद्ददत्ताए जाओ जहा उंबरदत्तो । नवरं सोरियजक्खदिन्नो त्ति कओ सोरियदत्तो नाम । सो य मए समुद्ददत्ते मच्छियाणं मेहरीहूओ राइंदियं बहुमच्छवहबंधण-पयण-असणनिरओ कया वि भुजंतो विद्धो गलए मच्छकंटएण । महावेयणत्तो य सव्वत्थुग्घोसावेइ - 'जो मं पगुणीकरेइ तस्स जंमग्गियं देमि' । तं च सोउं लग्गेहिं [वेज्जेहिं] न सक्किओ पगुणीकाउं। तओ तहा जाओ जहा तए दिट्ठो' ।
गोयमो भणइ – 'सामि ! इओ सो कहं होही ?' सामी भणइ – 'सो सत्तरिवासाऊ विहस्सइदत्तो व्व भमियसंसारो हत्थिणाउरे मच्छो मच्छियमारिओ तत्थेव नयरे सिट्ठिपुत्तो सोहम्मदेवो य होउं महाविदेहे सिज्झिही' । [जहा देवदत्ता । तं जहा –]
इहेव जंबुद्दीवे भारहे वासे रोहीडए नयरे वेसमणदत्तो नाम राया । तस्स सिरी नाम भारिया देवी। तीसे पूसनंदी नाम पुत्तो जुवराया । तहा दत्तो नाम भंडसालिओ । तस्स कण्हसिरी नाम भज्जा। तीसे देवदत्ता नाम दुहिया । समोसरियस्स तत्थेव ध[र]णजक्खाहिट्ठिए पुढविवडेंसगुज्जाणे सामिस्स गोयमो उज्झियगं व विणडिज्जमाणिमित्थियमेगं दट्ठणाऽऽगओ सामि भणइ – 'भगवं ! का सा नारी ?' सामी भणइ -
इहेव जंबुद्दीवे भारहे वासे सुप्पइठ्ठपुरे महसेणो राया । तस्स देवीसहस्सपहाणा धारिणी नाम देवी।
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |