Kahavali Pratham Paricched Part 02

SR No.: 007109
Original Sutra Author: N/A
Author: Kalyankirtivijay
Publisher: Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad
Publication Year: 2016
Total Pages: 378
Language: Sanskrit
Classification: Book_Devnagari
File Size: 13 MB

Page 138

[१२१]
तओ जंबुनामेण भणियं - 'पिययमाओ ! नाऽहं विसयलोलो जहा ललिय[गय]राओ त्ति ललियंगयकहा भण्णइ -
वसंतपुरे नयरे सयाउहो नाम राया । तस्स य ललिया नाम देवी । सा अन्नया मत्तवार[ण] ट्ठिया एगं रूवस्सिणं पुरिसं पेच्छइ । चेडी य तीसे समीववत्तिणी तं निच्चलदिढेि दट्ठण चिंतेइ – 'किमेसा देवी पेच्छमाणी चित्तकम्मनिम्मिया पुत्तलिया इव निच्चला ठिया ?' जाव पेच्छइ अहे ठियं पुरिसं । चिंतियं च णाए – 'एयंमि से पुरिसे दिट्ठी अभिरमइ' । विन्नविया य तीए – 'सामिणि ! एयं तुमं पुरिसं आयरेणं पेच्छसि । कस्स वा चंदंमि दिट्ठी न रमइ ?' देवीए भणियं – 'साहु सच्चं । को पुण एसो हवेज्जा ?' चेडी भणइ – "विसज्जेह मं, जेण जाणामि' । तओ सा विसज्जिया, गंतूणं च नियत्ता साहेइ - 'इहेव नगरे समुद्दपियस्स सत्थवाहस्स पुत्तो ललियंगओ नाम कलाविहन्नू गुणवंतो य' । तओ ललिया तं वयणं सोऊण भणइ – 'हला ! मंदभग्गत्ताए तम्मि चक्खुपहपडिए वि जायं मे अनिव्वुयं हिययं' । चेडीए भणियं – 'वच्चामि, आणेमि तं तुब्भं हिययवल्लहं' । देवीए भणियं – 'अहं [लेहं लिहेडं देमि]'।
ताहे गया चेडी लेहं देवीसंतियं गहिऊण । गंतूण य दिट्ठो सो । भणिओ य सव्वं देवीदसणाइयं । तओ सो तं वयणं सोऊण लेहं चाऽवधारिऊण चेडिं भणइ – 'सुयणु ! अईव मे पसाओ । परं चंदलेहं को धरणिगओ छिवेज्जा ?' तीए भणियं - ‘असहायस्स अत्थो हत्थगओ वि विणस्सेज्ज, सुसहायस्स पुण न किंचि दुल्लहं । ता अम्हं भण'त्ति वोत्तूणं नियत्ता देवीए जहावत्तं सव्वं कहेति । संजाए य कोमुईमहूसवे राया आहेडगनिमित्तं गओ । तओ दासीए देवीविणोयसंपायणत्थं लेप्पमयजक्खपडिमाछलेणंऽतेउरे पइसारिओ ललियंगओ ।
तओ देवीए सह सो विसओवभोगवक्खित्तो कह वि लक्खित्ता महल्लएहिं समागयस्स रण्णो कहियं । तओ पयट्टो राया देवीए वासभवणं । नायं च तदागमणं निउणाए चेडीए । तओ दोहिं वि देवीदासीहिं अत्तणो रक्खानिमित्तं [पवेसिओ ललियंगओ पच्छाहरए ।] आगंतूण य तत्थ परपुरिस[म]पेच्छंतो गओ राया । ललियंगओ वि पच्छाहरए ठिओ परममसुइगंधमणुभवमाणो चिंतेइ – 'जइ एयाओ निग्गमो होज्ज तो अलमेरिसपज्जवसाणेहिं भोगेहि' । देवी-चेडीओ य तस्साऽणुकंपाए तत्थ कूवे भुत्तसेसमाहारं पक्खिवंति । ललियंगओ छुहावसेणं तं चेव उच्चिट्ठमुवजीवंतो चिट्ठइ । तओ कमेण संपत्ते पाउसकाले बहुमेहोदएण पूरिए पच्छाहरयकूवे [त]क्खालेण पवाहित्ता पाडिओ पागारबाहिरखाइयाए । तत्थ वि पउरपाणियपूरेणुच्छालिओ पडिओ खाइया तीरे मुच्छिओ य तत्थेव । तओ कह वि दिव्वजोगाऽऽगयाए दिट्ठो नियधाईए । संगोविओ सगिहं । तओ कमेण जारिसो चेव ललियंगओ [आसि तारिसो जाओ ।]
एवमेयस्स दिटुंतस्सेसो उवणओ – जहा सो ललियंगओ तहा जीवो अनिव्विन्नकामभोगो । जहा देवीपरिभोगो तहा आवायमहुरं विवायकडुयं विसयसुहं । जहा असुइकूवो तहा गब्भवासो । जहा भुत्ताहारपक्खेवो तहा जणणिपरिणामियमन्न-पाणं । जहा मेहोदएण पूरियासुइकूवा तक्खालेण निग्गमो तहा पोग्गलोवचएण पूरियासुइगब्भाओ जोणीणिग्गमो । जहा पागारबहिट्ठियखाइयाए पडणं तहोदरपासट्ठियसूयाउडीए पडणं । जहा जलाउलखाइयाओ तीरत्थे मुच्छा तहा जर-रुहिराउलक्खोमियाओ पासत्थे मुच्छा । जहा देहोवग्गहकारिणी धाई तहा कम्मविवागसंतइ त्ति ॥ ललियंगओ त्ति गयं ॥छ। १६॥ ...