Page Text
________________
[११४]
ताहे – 'तुम्हारिसीए इत्थीए न मह कज्जं' ति] भणिउं गओ अइंसणं । सा वि जहाजायसरीरा सरत्थंबे पविसिऊण ठिया ।
__इओ य सो वाणमंतरो ओहिं पउंजंतो पलोएइ जाव तं पेच्छइ । एयावत्थं पासिऊणं च अणुकंपा जाया । तओ तेण संबोहणनिमित्तं विउव्विओ सियालो । तेणाऽवि मंसपेसी मुहेण गहिया । इओ य मच्छो कूलंताओ उत्तरिऊणं नईतीरे ठिओ । सियालो वि मंसं मुहाओ चइऊण 'मच्छं गेण्हामि'त्ति पहाविओ । सो य मच्छो जले पविट्ठो । मंसपेसी वि गगणाओ ओयरिऊण विउव्वियाए सउणीए उक्खित्ता ताहे सो सियालो उभयभट्ठो अच्छइ । ताहे तीए महिलाए भणियं -
'मंसपेसिं चएऊणं, मीणं पेच्छसि दुम्मयं(ई?) । चुक्को मीणाओ मंसाओ, किमिदं झायसि जंबुगा ?' ॥ तेण भणियं - 'कोमारयं पई मोत्तुं, जारं पेच्छसि लंपडे ! । चुक्का पईए जाराओ, किमिदं झायसि संपयं ?' ||
[ताहे] सा सुट्टयरं भीया 'किमेयं ?'ति । ताहे वाणमंतरो अप्पणो रूवाइसयविभूई दरिसिऊण भणइ - 'पावे ! जइ वि तं तहा तए दुरायारत्तण[ओ] समायरियं तहा वि इयाणि जिणसासणं पवन्ना धम्म कुणसु' । तीए वि 'तह'त्ति पडिवन्नं । देवेण वि साहुणीसमीवं नेऊण पव्वाविय त्ति छ। नेउरपंडिया - सियाल त्ति गयं ॥छ।
_ 'ता सामि ! तुमं मोत्तुमम्हारिसजणाणुचिओदाहरणाणि संपत्ते वसणुस्सए भोगे ताव [ जाहि]' । जंबुनामो भणइ – 'नाऽहं पिययमाओ ! रागगहिल्लो जहा विज्जुमालि त्ति विज्जुमालिकहा भण्णइ -
अत्थि इहेव भारहे वासे वेयड्डो नाम गिरिवरो । तत्थ दाहिणसेढीए गगणवल्लहनयरे दुवे भायरो विज्जाहरतरुणा - मेहरहो विज्जुमाली य । ते य विपुलविज्जासाहणत्थं दो वि मंतेंति - 'गच्छामो भूमिगोयरसमीपं' । तासिं च विज्जाणं इमा विही – नीएसु कुलेसु कन्नाण पाणिग्गहणं कायव्वं, नियमेण य सुद्धं बंभचेरं धारेयव्वं संवच्छरं जाव । एवं सिद्धा विज्जा हवइ ।
___ ताहे ते गुरुजणं आपुच्छित्ता पत्ता इहेव दाहिणभरहे ओवइउं जाव वसंतपुरे नयरे चंडालवेसं काऊण पक्कणकुलं गया । गंतूण य पक्कणा आराहिया भणंति – 'किंनिमित्तं तुब्भे इहाऽऽगया ?' तेहि य सब्भावं गोविऊण भणियं - 'अम्हे खिइपइट्ठियाओ नयराओ माया-पिउणो ण कुडुंबवासे ठावंति त्ति रोसेण इहाऽऽगया' । मायंगेहिं भणियं – 'अत्थि अम्हाण कन्नाओ । किंतु जइ अम्ह जाइसरिसं अणुचिट्ठह ता देमो' । तेहिं 'तह'त्ति पडिवन्नं । दारियाओ काण-दंतुराओ लद्धाओ । सो य विज्जुमाली समहिलाए कुरूवाए वि रत्तो विज्जासाहणं न करेइ । तस्स य महिलाए गब्भो जाओ । इयरो वि मेहरहो सिद्धविज्जो पुण्णे संवच्छरे विज्जुमालि भणइ – 'जामो इण्हि सिद्धविज्जा सबंधवाण समीवे, विसिट्ठभोए उवभुंजामो। विज्जुमालिणा सलज्जेणोणयमुहेण भणियं - भाउय ! भग्गनियमोऽहं असिद्धविज्जो कहं गच्छिस्सामि तुम्हेहि समं ? एसा य वराई मम भज्जा जायगब्भा, कहं मुंचामि ? ता गच्छ तुमं । अण्णंमि अ वच्छरे आगच्छेज्जाह' ।
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |