Page Text
________________
[८५]
सो भाया । तम्हा अणसणइत्तस्सेव सा कण्णगा दायव्व'त्ति । तओ "नायमिममन्नं साहसु'त्ति दासीपुट्ठा चित्तयरसुया भणइ – 'हले ! अत्थि एगाए महाडवीए महं रत्तासोओ नाम पायवो । सो य साहापसाहाहिं महावित्थरो परं समंतओ नत्थि छाया' । दासी भणइ - 'सामिणि ! किमेरिसं ?' सा वि 'निद्दाइया अहं कल्लं कहिस्सं'ति वोत्तुं सुया ।
तओ तहेव लद्धवारया भणइ - 'हलो ! तस्स पायवस्स हेट्ठा च्छाया न उण उवरि । दिट्ठो अ सो रत्तासोओ दुग्गयमणुएण एगेण अडवि परिब्भमंतेण । चिंतियं चऽणेण - 'जस्सेरिसो पल्लवनियरो तस्साऽणन्नगसारिसाए फलरिद्धीए भवियव्वं' । सो य पायवं जलेणाऽहिसिंचइ । एवं च तस्स दुग्गयपुरिसस्स फलनियरमविक्खमाणस्स विइक्कंता दुवालसमासा । समागओ तत्थ कह वि रत्तासोअसब्भाववियाणओ एगो पुरिसो । तेण वि भणिओ दुग्गओ – 'सुटु एवं मा लक्खेसु जहा पल्लवसारिच्छाए फलरिद्धीए होयव्वं । जओ एयस्स सेवाए खलपायस्सेव फलसंपत्ती न हवइ । अवि य -
मा पत्तलं तं सेवसु, रत्तासोयं इमं फलासाए ।
एयस्स पल्लव च्चिय, मणोरमा न उण फलरिद्धी ॥ सोउं चेमं सो दुग्गओ नियत्तासोयमणोरहो गओ घरहुत्तं'ति ।
तओ 'नायमिमं, अण्णं साहसु'त्ति दासीपुट्ठा चित्तयरसुया भणइ – 'अत्थि चंपापुरीए सिवो नाम राया । तेण य भूमिहरए छूढा सुवन्नयारा । ते य मणिरयणदीवुज्जोएणाऽऽभरणविहिं अंतेउरनिमित्तं घडिति। पओससमए य तम्घडित्तजोयणत्थं तत्थेवाऽऽगओ राया । तेण पच्छिया सोन्नारा - 'भो का संपयं वेला ?' तेसिं चेगेण 'रयणी वट्टइ'त्ति भणिए समत्थियं तं चेव बीएणं' । दासी भणइ - 'सामिणि ! जो चंदसूराई न पेच्छइ सो कहं जाणइ ?' । सा वि 'निद्दाइया संपयं, कल्लं कहिस्सं'ति वोत्तुं सुत्ता ।
तओ तहेव लद्धवारया भणइ - 'हले ! तेसिं पढमेण नाया रत्तिअंधलत्तणओ रयणी । बीएणं पुण रायहत्थट्ठियमुकुलियकमलदसणाओ' । तओ 'नायमिममण्णं साहसु'त्ति दासीपुट्ठा चित्तयरसुया भणइ - 'अत्थि सीहउरे नयरे सूरो नाम राया । तस्स य तलारेणोवट्ठविया दो चोरा । ते य मंजूसाए पक्खिवित्तु पकहिया समुद्दे । सा य मंजूसा [*केणइ पोयवणिएणसेट्ठिणा समुद्दमज्झे पवसंतेण दिट्ठा निज्जामएहिं च उव्वराविया । तओ उग्घाडिऊण जाव पेच्छइ ताव दुवे चोरा खुहा-पिवासाहिं आउलीहूया विणिग्गया । सेट्ठिणा पुच्छयं - "केत्तियाणि दिणाणि जायाणि तुम्ह समुद्दमज्झे ?" ताहे एगेण कहियं - "अज्ज चउत्थो दिणो"त्ति' । एत्थंतरंमि दासीए भणियं – 'सामिणि ! मंजूसाए पक्खित्तेण चोरेण कहं विय नायं जहा अज्ज चउत्थो दिणो ?'त्ति । सा वि 'निदाइया अहं, कल्लं कहिस्सं'ति वोत्तुं सुया ।
तओ तहेव लद्धवारया भणइ – 'तेसिं चोराणं मझे एगस्स चोरस्स एगंतरिओ जरो आसी । अओ बिइयवारं जरक्कतेण तेण नायं जहा अज्ज चउत्थो दिणो'त्ति । दासीए भणियं – 'नायमिमं । अण्णं कहेहि'त्ति दासीपुट्ठा चित्तयरसुया भणइ' – 'अत्थि [एगंमि] नयरे [एगो] राया । तस्स य भज्जाए * कथेयमपूर्णाऽस्ति, अतो यथामति पूरिता । + इयमपि कथाऽप्राप्तारम्भांशा वर्ततेऽतो यथामति लिखिता ।
| SR No. | 007109 |
| Book Title | Kahavali Pratham Paricched Part 02 |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2016 |
| Total Pages | 378 |
| Language | Sanskrit |
| Classification | Book_Devnagari |
| File Size | 13 MB |