________________
મામાના ઘરમાં છવાયેલ અંધકારને દૂર કરવાની તાકાત તરવરતી હતી. એથી ગઈકાલનો મેઘો બીજા જ દિવસથી મેઘાશાહના નામે સાન પામી રહ્યો.
થોડા વધુ દિવસ વીત્યા અને પાટણની બીજી એક વહેલ ભટેવર આવી. એમાં શેઠ લક્ષ્મીપતિ પોતાની પુત્રી ધનશ્રી માટે નેઢનું માગું કરવા આવ્યા હતા. મંત્રી વીરના પરિવાર સાથે પહેલેથી જ એમને સારી ઓળખાણ હતી, એમાં વળી નગરશેઠે પોતાની પુત્રી માટે વિમલની પસંદગી કરી, એથી નેઢ પર પસંદગી ઉતારવાની એમની ભાવનાને વેગ મળ્યો હતો. શ્રીદત્ત શેઠે જ્યારે આ વાત જાણી, ત્યારે એમણે લક્ષ્મીપતિ શેઠના એ મનોરથ વધાવી લઈને એમને વધુ પ્રોત્સાહિત બનાવ્યા અને શેઠ લક્ષ્મીપતિ બનતી ઝડપે ભટેવર જઈ પહોંચ્યા. - વીરમતિએ લક્ષ્મીપતિ શેઠને આવકાર આપ્યો, એમણે પોતાની પુત્રી ધનશ્રી માટે નેઢનું માગું કર્યું અને સૌની પ્રસન્નતા વચ્ચે એનો સ્વીકાર થયો. લક્ષ્મીપતિ શેઠ સાથે શ્રીદત્ત શેઠે લગ્નપ્રસંગનું મુહૂર્ત પાઠવ્યું હતું. ૧૫ દિ' પછી સારો દિવસ આવતો હતો. એથી ભટેવર અને પાટણમાં લગ્નપ્રસંગની જોરદાર તૈયારીઓ ચાલુ થઈ. એક તો અંબિકાદેવીની પ્રસન્નતા પ્રાપ્ત થઈ હતી, બીજું ક્ષેત્ર-દેવતાએ પ્રસન્ન થઈને ચરુની ભેટ આપી હતી. એથી ખૂબ જ ધામધૂમપૂર્વક લગ્ન પ્રસંગની ઉજવણી કરવાના મેઘાશાહના મનોરથ હતા, એકીસાથે નેઢ અને વિમલના લગ્ન-મહોત્સવનો નિર્ણય લેવાતાં એની તડામાર તૈયારીઓથી આખું ભટેવર ગામ ઉલ્લાસ-ઊર્મિઓની છોળો વચ્ચે જાણે નખશિખ સ્નાન કરી રહ્યું !
ભાગ્ય આડેની ભીંત ખસી જતાં, ભાગ્યના એ ભાનુને ફરી ઝગારા સાથે પ્રકાશી ઊઠતાં વાર લાગતી નથી, એ આનું નામ ! આવી આવી વાતોથી ભટેવર ગામનું ગગન ગાજી ઊઠ્યું. એ ગર્જનાના પડઘા છેક પાટણ સુધી લંબાયા અને ભૂલાયેલા બચપણની સ્મૃતિની જેમ
૭૮ આબુ તીર્થોદ્ધારક
