________________
_
|
|
(૯) ગિરનારની ગીત-ગાયિકા
માથે કોઈ છત્ર ન હતું. સિવાય વિરાટ આકાશ ! પગ નીચે કોઈ આધાર ન હતો. સિવાય પથરાળ ધરતી !!
ને એક નોંધારી નારી પોતાની કૂખની કુંજમાં ઊગેલાં બે માસુમ ફૂલોને લઈને દોડી રહી હતી. મૃત્યુ જાણે પડછાયો બનીને, એનો પીછો પકડવા મથી રહ્યું હતું ! પણ એની જીભ પર તો ગિરનાર રમતો હતો, ગભરાટની તીણી ચીસો ત્યાં ન હતી ! એની આંખ તો ગિરનારના અધિષ્ઠાતા ભગવાન નેમને જ નિહાળી રહી હતી. મોતના મોંમાંથી ઉગારે, એવી દીન, હીન, ને કાકલૂદીભરી પ્રાર્થના ત્યાં ન હતી !
