________________
હું વફાદાર રહીશ અને જિન-ધર્મનાં ગાન છેલ્લા શ્વાસ સુધી લલકારતો જ રહીશ.”
એક બાજુ જૈનસંઘોનું જૂથ બેઠું હતું, તો બીજી બાજુ ખેંગાર અને ભિખુ સંઘની બેઠક હતી. હવામાં સન્નાટો છવાઈ ગયો ! “કાં આ પાર કે કાં પેલી પાર'નો ખેલ હતો.
ખેંગારની જીભ જંગ ખેલવા નીકળી પડી :
બળભદ્ર ! તીર્થની રક્ષા કાજે તો જંગ ખેલાશે, જંગ ! તું શું કરી શકવાનો હતો? અહિંસા તારો ધર્મ છે, તારી પાસે એવું તે કયું કૌવત ભર્યું પડ્યું છે, જે કૌવત કુરુક્ષેત્ર રચી શકે ! અને મરી ફીટનારના મહિમાને ગાતું “મહાભારત' રચાય !!
“અહિંસાની મશ્કરી ! મા ઉપર આક્ષેપ ?' મુનિ બળભદ્ર ઊછળી પડ્યા. આખી સભા ખળખળી ઊઠી !
અહિંસા-ધર્મનો પૂજારી વખત આવ્યે પૂજામાં પોતાનું માથું પણ મૂકી શકે છે. અહિંસા ક્ષુદ્રની નહિ, ક્ષત્રિયની છે. જે અહિંસા કીડીની રક્ષા કરવાનું કહે છે, એ જ અહિંસા વખત આવ્યે કુંજરની સામે પડવાની હાકલ પણ કરી શકે છે. કારણ અહિંસા કાયરની નહિ, કૌવત-ધારીની છે !
જ્યાંથી ગઈ કાલે મયૂરનો કેકારવ હતો, ત્યાંથી આજે સિંહનાદ થઈ રહ્યા હતા ! મુનિ બળભદ્રની જવાંમર્દી જંગ જીતવા નીકળી પડી હતી. તેઓ વધુ ઉગ્ર બન્યા :
“ખેંગાર ! જાનની બાજી લગાવીશું, પણ જિનની રક્ષા કરીશું ! કારણ જૈનને મન જાન કરતાં જિન વધુ વહાલા છે ! બાજી હજી હાથમાં છે, માની જાવ ! નહિ તો કાલે ઝંઝાવાત જાગશે ! જૂનાગઢનો રાજવી એ ઝંઝામાં હોમાશે !”
તમારી પાસે એવી તે કઈ શક્તિ છે કે, જૂનાગઢનો રાજવી ડરી જાય? હું ડરનાર નથી, હું તો ડારનાર છું!
ગિરનારની ગૌરવગાથા
