________________
ગિરનારની રખવાળણ શાસનદેવી અંબાના ચરણે સાત સાત ક્ષેત્રપાલી પ્રણામ કરતા ઊભા હતા. એ એકદમ થંભી ગયા. “રોલાતોલાની પર્વતમાળથી ગિરનાર ઘણો દૂર ન હતો. રત્નને ડગાવવા ત્યાં આરંભાયેલી તાંડવ-લીલાના પડઘા ક્ષેત્રપાલોના કાને ટકરાયા અને તેઓ અવાક્ બની ગયા !
પર્વતના ધણધણાટ ચાલુ જ હતા. એના ધ્વનિ “અંબા'ના રહેઠાણે પહોંચ્યા. ક્ષેત્રપતિઓ વિમાસણમાં હતા. અંબાએ જ્ઞાનની પ્રકાશ-રેખા વડે જોયું, તો કંચન અગ્નિસ્નાનની જીવલેણ પળોને વિતાવી રહ્યું હતું, એક શહીદ પોતાનાં શોણિત અને શરીરના ભોગે પણ શપથની શાન બઢાવવા ઝઝૂમી રહ્યો હતો !
શાસનદેવી અંબા ઊભાં થઈ ગયાં. ક્ષેત્રપાલોને એમણે આ વાત જણાવી અને બધા એ પિશાચને પડકાર આપવા તૈયાર થઈ ગયા. અંબાદેવીની સાથે ક્ષેત્રપાલો સીધા જ પર્વતની એ ધરતી પર પહોંચ્યા અને એમણે એકી અવાજે પિશાચને પડકાર્યો : રે ! દુખ ! તે આ શી તાંડવ-લીલા આરંભી છે? લડી લેવાની જો તાકાત હોય, તારું લોહી જો ઊકળી ઊઠ્યું હોય તો આવી જા મેદાને ! સિંહના સંગ્રામ સિંહની સામે જ શોભે, સસલાં સામે નહિ ! દૈવી-શક્તિ વચ્ચે જ હરીફાઈ જામી શકે ! તું દેવ છે ને સામે માણસ છે. આ અજુગતી હરીફાઈ છે ! હું અંબા અને આ સાત સાત ક્ષેત્રપાલો, રત્નશ્રાદ્ધ અને એનાં પત્ની ને પુત્રની રક્ષા કાજે આવ્યાં છીએ ! હવે એમનો વાળ પણ વાંકો નહિ થઈ શકે.'
ક્રોધનો અગ્નિ વીફર્યો તો હતો જ! એમાં વળી પાછી ઘીની મુશળ ધાર રેડાઈ, પિશાચ છંછેડાઈ ગયો અને એ યુદ્ધ કાજે કૂદી પડ્યો.
પિશાચ પોતાના ક્ષેત્રે ભલે અજેય હતો, પણ આ તો એથીય વધુ ઊંચી કક્ષાનું દૈવીબળ હતું ! સામસામો સંગ્રામ જામી પડ્યો. પિશાચ એકલો હતો. સામે સાત સાત ક્ષેત્રપાલો અને અંબાદેવી હતાં ! અંબાદેવી
ગિરનારની ગૌરવગાથા $ ૩૫
