________________
સામા પક્ષને એવો ખ્યાલ પણ ન હતો કે, ધારના પુત્રોની શહીદી ને એ પાંચ પાંચ બલિદાનનો પડઘો આવો જબ્બર ને જીવલેણ પડશે ! એમણે પણ પોતાનું સંગઠન ને બળ જમા કરવા માંડ્યું.
ગિરનારના રાજાએ આજુબાજુના રાજાઓ પર સસૈન્ય આવી જવાના કહેણ પાઠવ્યાં ને ધીમે ધીમે અગિયાર અગિયાર રાજાઓ પોતાના દળ-બળ સાથે ગિરનારની તળેટીએ છાવણી નાંખીને એકત્રિત થઈ ગયા. આમ એક બાજુ આતતાયીઓ પોતાનું બળ વધારી રહ્યા હતા, ત્યારે બીજી બાજુ સૂરિરાજ બપ્પભટ્ટિ ને સંઘપતિ આમરાજ સંઘ સાથે ધીમે ધીમે ગિરનાર તરફ આગળ વધી રહ્યા હતા.
આમરાજે પોતાના ગુપ્તચરો દ્વારા ગિરનારની બધી માહિતી મેળવી લીધી હતી. આ બધું જાણ્યા પછી એમના રક્તકણો ઊકળી ઊઠ્યા, ને એમણે યુદ્ધની ભેરી બજાવીને અને સમશેરો ચલાવીને પણ આતતાયીઓને નાથવાનો નિર્ણય લઈ લીધો.
સૂરિરાજનો વિચા૨કોણ આમથી જરા જુદો હતો ! એમની દૃષ્ટિએ વાગ્યુદ્ધ પછીનું જ ધર્મયુદ્ધ વાજબી હતું પણ આતતાયીઓને હઠાવવાના વિષયમાં તો બન્ને એકમત જ હતા ! બન્ને શક્તિઓ પોતપોતાના ક્ષેત્રે બિનહરીફ અને અજોડ હતી ! સૂરિરાજ શાસ્ત્રના અગાધ વેત્તા હતા, તો આમરાજા શસ્ત્રના ! એક કલમ ચલાવી જાણતા હતા, તો બીજા કૃપાણ !
બન્ને પક્ષ જે દિવસની રાહ જોઈ રહ્યા હતા, એ દિવસ આવી પહોંચ્યો ! વિરાટ સંઘ એક દિવસ ગિરનારની પગથાર આગળ આવી ઊભો ! સામે અગિયાર અગિયાર આતતાયીઓનું એકઠું થયેલું બળ ઊભું રહી ગયું, ને પછી એ રણહાકો પ્રચંડ પડઘા પાડી રહી :
‘આ તીર્થ પર જેનો અધિકાર ન હોય, એ એક ડગલું પણ આગળ ન જ વધે ! અગિયાર અગિયાર રાજાઓની આ આણ છે !’
ગિરનારની ગૌરવગાથા ૪ ૧૯
