________________
અધિકાર નામંજૂર જાહેર કરવો ! આમ છતાંય જો ધાર્યા પાસા ન પડે, તો છેલ્લે યુદ્ધ.......?
આ દેખીતો અન્યાય હતો, પણ પક્ષનો આંધળો પ્રેમ ન્યાયની આંખને ધૂંધળી બનાવીને અન્યાયની આંખમાં તેજ મૂકતો હોય છે. - સંઘ જ્યાં તીર્થની પગથાર આગળ આવી ઊભો, ત્યાં જ સામો પક્ષ દીવાલ બનીને ઊભો રહી ગયો ! એની વાત એક જ હતી કે, આ તીર્થ પરની એક તસુ જેટલી ધરતી પર પણ તમારો અધિકાર નથી, માટે ચાલ્યા જાવ ! નહિ તો પરિણામ ખતરાભર્યું આવશે !
એ દિવસે પ્રત્યેકની આંખેથી આંસુધાર વહી રહી ! એ આંસુધારે જાણે ગિરનારની તળેટી અભિષેકાઈ, ને સંઘ પાછો વળ્યો ! - હવે શું કરવું? સમસ્યાનો ઉકેલ લાવવા સંઘના મોવડીઓ એકઠા થયા. ઘણી મંત્રણાઓ પછી આ અન્યાયની સામે પડવા રાજાની સહાય માંગવાનો એકમતે નિર્ણય લેવાયો ! પણ અન્યાયની એ સુરંગનો દોર ખુદ રાજાના હાથમાં જ હતો અને રાજા તરફથી જ એમાં દારૂ-દેવતા ચંપાતા હતા!
સંઘનું એક વગદાર મંડળ રાજાને ચરણે ભટણું ધરીને ઊભું રહી ગયું અને પોતાની પર તોળાયેલા અન્યાયની ફરિયાદ એણે રજૂ કરી !
સામો પક્ષ દૂરંદેશીભર્યો હતો, ગિરનાર પર પોતાના અન્યાયના આંદોલનને આકાર આપતાં પહેલાં જ એણે રાજાની કૃપા મેળવીને એ રાજાને પોતાનો બનાવી લીધો હતો!
સંઘના મોવડીઓ પોતાની ફરિયાદ સંભળાવીને એનો પડઘો સાંભળવાની પ્રતીક્ષા કરી રહ્યા. પણ એ પડઘો સાંભળતાં જ મોવડીઓ હતાશ બની ગયા ! રાજાએ કહ્યું :
“આમાં અન્યાયની છાંટ પણ ક્યાં છે? આ તીર્થ પર શ્વેતાંબરોનો અધિકાર પણ સાબિત થઈ શકતો નથી !'
૧૦ હું ગિરનારની ગૌરવગાથા
