________________
નિષ્પરિગ્રહીને સુખ-શાંતિ છે. તેને કકડીને ભૂખ લાગે છે, ખાધેલું આરામથી પચે છે, નિરાંતે ઊંઘ આવે છે. સમૃદ્ધિમાન તો સાત મણની તળાઈમાં તરફડે છે, છતાંય ધનની તૃષ્ણા કોઈની મટતી નથી, વધતી જ જાય છે.
એક ભિખારીની કંગાળ હાલત જોઈને નારદજીને કરુણા ઉભરાઈ. આ ભિખારીના દળદર ફેડવાનો એક ભલામણ પત્ર લખી આપીને તેને કુબેરજી પાસે મોકલ્યો. કુબેરને ચિઠ્ઠી આપીને ભિખારીને તેની સામે પોતાનું પાત્ર ધર્યું. કુબેરજીએ ભંડારમાંથી સોનામહોરોનો મોટો ખોબો ભરીને તેના પાત્રમાં નાંખ્યો, પાત્ર ન ભરાયું. બીજો ખોબો, ત્રીજો ખોબો....એમ એક પછી એક કરતા સેંકડો-હજારો ખોબા ભરીને સોનામહોરો અને રત્નો તે પાત્રમાં નાંખવા છતાં પાત્ર ખાલી જ રહ્યું. કુબેરજીનો આખો અખૂટ ભંડાર ખાલી થઈ ગયો પણ, પાત્ર તો ખાલી જ રહ્યું. કુબેરજીને ખૂબ આશ્ચર્ય થયું. આટલું બધું નાંખવા છતાં ભરાય નહિ એવું પાત્ર કઈ ધાતુનું બનેલું છે તે જાણવાની તેમને ખૂબ ઉત્સુકતા થઈ. ભિખારી પાસેથી પાત્ર હાથમાં લઈને તેમણે એક લેબોરેટરીમાં ટેસ્ટીંગ માટે મોકલ્યું. થોડા કલાકોમાં ટેસ્ટિંગ થઈને લેબોરેટરીનો રિપોર્ટ આવી ગયો.
ત્રણેય કાળના બધા જ કુબેરોની તિજોરીઓ તળિયાઝાટક થઈ જાય તો પણ આ પાત્ર નહિ ભરાય, કારણ કે તે માનવીની ખોપરીમાંથી બનેલું
છે.
ક્યારેય ન ભરાવાના અને ન ધરાવાના સ્વભાવવાળા મનને ભરવા મથતો માનવી સૌથી વધુ બુદ્ધિશાળી પ્રાણી ગણાય છે ! પૈસાની ચારે બાજુ દુઃખ પથરાયેલું છે. પૈસાની ચારે બાજુ પાપ પથરાયેલું છે. પૈસા મેળવવાની ઈચ્છા થતા તૃષ્ણાનું પાપ. પ્રયત્નો છતાં મળે નહિ તો અતૃપ્તિનું દુઃખ.
હૃદયકંપ ૧૧
