________________
આવાં ફૂલોને પણ તોડતી વખતે ઓછી પીડા થાય તે માટે તેમાં પણ જયણાનો વિવેક છે. તાંબાના, ચાંદીના કે સોનાના અણીદાર નખ બનાવવા જેથી અલ્પ પીડાએ તરત ચૂંટાઈ જાય. આ રીતની જયણાની વિધિ બતાવી છે. તે અનુસારે કરોડો ફૂલ ચઢાવો તો પણ દોષ નથી, ભક્તિની વૃદ્ધિ છે.
સભા :- ફૂલો સોયમાં ન પરોવાય ને?
સાહેબજી - ના, ન પરોવાય. જયણા પાળવાની આજ્ઞા છે. ફૂલ ચૂંટી લીધા પછી તે તરત જડ નથી થઈ જતાં. ભગવાનના અંગ પર ચઢાવો ત્યારે પણ જીવતાં હોય છે. માત્ર પોષણ માટેની જે ઝાડ સાથેની link-જોડાણ-કડી હતી. તે ચૂંટાવાથી કપાઈ ગઈ, પણ ચૂંટાયા પછી તત્કાલ નિર્જીવ થતાં નથી. માટે તેને ગમે તેમ પ્રભુના અંગ પર ખોસો કે સોયમાં પરોવો તે બરાબર નથી.
સભા:- પણ ફૂલ ચઢાવવામાં જીવહિંસા તો ખરી ને?
સાહેબજી:- દરેક વર્ષે કલ્પસૂત્રમાં સાંભળો છો કે દેવતાઓ ભગવાનનો એક કરોડ અને સાઠ લાખ કળશોથી જન્માભિષેક કરે છે. પાછા કળશ પણ તમારી ટબૂડી જેવડા નહીં; પરંતુ યોજન પ્રમાણ હોય છે. ભગવાનનો આ રીતે પ્રક્ષાલ કરે તો અસંખ્ય-અસંખ્ય જીવો મરે છે. મહાવીર પ્રભુના જન્માભિષેકના અવસરે પ્રભુની કાયા અન્ય તીર્થકરોની અપેક્ષાએ કદમાં નાની હોવાથી સૌધર્મેન્દ્રને પ્રભુ પ્રત્યેની અતિશય પ્રીતિને વશ મનમાં પ્રશ્ન થયો કે આટલા પાણીના ધોધને પ્રભુનો લઘુ દેહ કેમ સહન કરશે? આ ઉપરથી તમે વિચારી શકો કે અભિષેકમાં કેટલું જળ વપરાતું હશે ! અને આ ભક્તિ કરનારા સમ્યગ્દષ્ટિ દેવતાઓ છે. તેથી અનુચિત ભક્તિનો સવાલ નથી.
તમે પૂજા કરતાં પાણીની ખોટી કરકસર કરો તો પણ પાપ લાગે. તમને એમ થાય કે જુદા જુદા અભિષેક કરીને આટલું બધું પાણી ઢોળવા કરતાં દસ જણ સાથે હાથ લગાડી અભિષેક કરી લે તો ચાલે તો તે પાપભાવ છે.
સભા - ઉકાળેલા પાણીથી પ્રક્ષાલ કરીએ તો?
સાહેબજી:- તમારે કાચું પાણી ન વાપરવું, તેવું પચ્ચખ્ખાણ છે? જો તમારે કાચા પાણીને અડવું પણ નહીં એવો નિયમ હોય તો અમે તમને પ્રક્ષાલ કરવાની ના પાડીશું. સાધુઓને કાચા પાણીને નહીં અડવાના જીવનભરનાં પચ્ચખાણ હોવાથી પ્રક્ષાલ નથી જ કરવાનો. તમારા પોતાના ઉપયોગ માટે ગમે તેટલી ડોલો પાણી
લોકોત્તર દાનધર્મ “અનુકંપા”