________________
૧૩
નમોડસ્તુ વર્ધમાનાય
સૂત્ર પરિચય :
શ્રી વર્ધમાન સ્વામીની એટલે કે ચરમતીર્થપતિ, આપણા આસન્ન ઉપકાર શ્રી વીરપ્રભુની આ સ્તુતિ છે. તેથી તે “વર્ધમાનસ્તુતિ' તરીકે પણ ઓળખાય છે.
છ આવશ્યકની પૂર્ણાહૂતિ થયા પછી મંગલ-સ્તુતિ નિમિત્તે પુરુષો આ સૂત્ર બોલે છે. તેની પહેલા તેઓ નમો હેતુ થી મંગલાચરણ કરે છે. આ અતિસુંદર કાવ્યની રચના કોણે કરી છે તે ખ્યાલમાં નથી, પરંતુ શ્રી તિલકાચાર્યજીએ રચેલી સામાચારીમાં આ સ્તુતિ જોવા મળે છે. સંસ્કૃત ભાષાના ત્રણ જુદા જુદા ગેય છંદોમાં આ સ્તુતિની રચના છે. સૌની સાથે ભાવપૂર્વક તેને ગાતા વીરપ્રભુની અનેક અદ્ભુત વિશેષતાઓથી ચિત્ત રંજીત થયા વિના રહેતું નથી.
આપણી પરંપરા પ્રમાણે પ્રથમ સ્તુતિ અધિકૃત જિનની, બીજી સ્તુતિ સામાન્ય જિનની અને ત્રીજી સ્તુતિ આગમ અથવા શ્રુતજ્ઞાનની હોય છે. આ સૂત્ર પણ આ પ્રસિદ્ધ પરંપરાને અનુસરે છે. તેમાં પણ પહેલી ગાથામાં વર્ધમાન સ્વામીને નમસ્કાર કરાયો છે, બીજી ગાથામાં ચોત્રીસ અતિશયો આદિ ઋદ્ધિસંપન્ન સર્વ જિનોને પ્રાર્થનામાં આવ્યા છે. પ્રાંતે છેલ્લી ગાથામાં “મારા ઉપર શ્રુતજ્ઞાન તુષ્ટ થાઓ એવા રોમાંચિત કરનારા શબ્દો દ્વારા મને તત્ત્વજ્ઞાનની પ્રાપ્તિ થાઓ.” મારા હૈયામાં પ્રભુના વચનોનો વાસ હો એવી સુંદર ભાવના વ્યક્ત કરાઈ છે.
