________________
૧૬૨
સૂત્ર સંવેદના
નથી. તમામ દોષોને પોતાના જ્ઞાનમાં સમાવી લે છે. આથી જ ભગવાન સાગરથી પણ ગંભીર છે.
સિદ્ધા સિદ્ધિ મમ વિનંતુ ઃ આવા સિદ્ધો મને સિદ્ધિ આપો.
કર્મમલ વિનાના, કેવળજ્ઞાનને પામેલા અને અતિ ગંભીર એવા હે સિદ્ધ ભગવંતો ! મને મહાઆનંદ સ્વરૂપ, મહાઉત્સવ રૂપ, અનંત સુખના ધામ સ્વરૂપ સિદ્ધિ મોક્ષ આપો.
=
અરિહંત ભગવંતો ચાર અઘાતીકર્મવાળા છે, તેથી તેમને આમ તો સિદ્ધિની પ્રાપ્તિ નથી થઈ પણ તેમને સિદ્ધિની પ્રાપ્તિ જાણે.થઈ જ ગઈ છે, તેવો ભાવ ઉપસ્થિત કરવા સિદ્ધઅવસ્થાનો ઉપચાર કરીને અહીં અરિહંતોને જ સિદ્ધ તરીકે સંબોધ્યા છે અને અરિહંત ભગવાનની સ્તવના કરીને અંતે અરિહંતોને ઉદ્દેશીને જ સિદ્ધ ભગવંતો મને સિદ્ધિ આપો તેમ કહેવાયું છે. અથવા સિદ્ધ ભગવંતો પાસે જ સિદ્ધિની માંગણી કરવામાં આવી છે, તેમ કહીએ તો પણ યોગ્ય જ છે.
આ પદ બોલતાં મહાસુખના સ્વામી બનેલા સિદ્ધ પરમાત્માઓ આપણી નજર સમક્ષ હોવા જોઈએ અને હાથની અંજલી કરી મસ્તક નમાવી હૃદયના ભાવપૂર્વક સિદ્ધ ભગવંતોની પાસે સિદ્ધિ એટલે મોક્ષસુખની આપણે માંગણી કરી રહ્યા છીએ, તેવો ભાવ વ્યક્ત થવો જોઈએ.
અહીં પણ જે સિદ્ધની માંગણી કરી છે, તે પોતે માંગશે અને ભગવાન આપી દેવાના છે, તેવું નથી. તો પણ આવા પ્રકારની માંગણી મોક્ષ પ્રત્યેની જે રૂચિ છે, તેને બળવાન કરે છે. આ રીતે પુનઃ પુનઃ માંગણી કરવાથી શુભભાવ પેદા થાય છે. શુભભાવ કર્મનો નાશ કરાવી મોક્ષ પ્રાપ્તિ માટેનું સત્ત્વ વિશેષ ઉલ્લસિત કરે છે. આથી જ આવા ગુણવાન વ્યક્તિ પાસે થતી આવી માંગણીઓ યોગ્ય છે, તે કોઈ નિદાનસ્વરૂપ પણ નથી અને નિરર્થક પણ નથી. કેમકે, એમાં કોઈ સંસારના સુખની આકાંક્ષા નથી અને વીતરાગ પાસે કરેલી આ માંગણી ચોક્કસ શુભભાવ દ્વારા ઉત્તરોત્તર તે વસ્તુને પ્રાપ્ત કરાવે જ છે, માટે સાર્થક છે.
