________________
આ બાજુ સમગ્ર ટ્રસ્ટી મંડળ અને તીર્થરક્ષા સાથે જોડાયેલા બીજા પણ મહાનુભાવો ગચ્છાધિપતિ આચાર્ય દેવ રામચન્દ્રસૂરીશ્વરજી મ.સા.ને મળવા જાય છે. તેઓશ્રીને પણ સંપૂર્ણ માહિતી આપે છે. યોગાનું યોગ તો જુઓ પૂ. રામચન્દ્રસૂરીશ્વરજી મ.સા. એ પણ તીર્થરક્ષાના મહાન કાર્યની જવાબદારી ચન્દ્રશેખર મહારાજ સંભાળે તેવો ભાવ પત્ર દ્વારા દર્શાવ્યો. અને ભુવનભાનુસૂરીશ્વરજી મ.સા. એ પણ ચન્દ્રશેખર મહારાજને આ જવાબદારી સંભાળવા આદેશ કર્યો.
મુંબઈ ખાતે શ્વેતાંબરો દ્વારા ચન્દ્રશેખર મહારાજના નેતૃત્વમાં તીર્થરક્ષા માટેનું આંદોલન શરૂ થયું.
સમગ્ર મુંબઈમાં પથરાયેલા હજારો યુવાનો, કે જેઓ પૂ. ચન્દ્રશેખર મહારાજને પોતાના તારક માનતા હતા. તે યુવાનો ચન્દ્રશેખર મહારાજ સાથે કામે લાગે છે.
વિ.સં. ૨૦૩૭નું ચાતુર્માસ અંતરિક્ષ તીર્થ ખાતે ચન્દ્રશેખર મહારાજે નક્કી કર્યું. મુંબઈથી અંતરિક્ષજી લગભગ ૬૦૦ કી.મી. દૂર હતું.
અંતરિક્ષજી તરફના વિહાર પૂર્વે છેલ્લા દસ-બાર દિવસ ચંદનબાલા મુંબઈ રોકાવાનું નક્કી થયેલ અને “અંતરિક્ષ સપ્તાહ”નું ત્યાં આયોજન થયેલ. સાતેય દિવસ પ્રવચનો દ્વારા અંતરિક્ષ તીર્થ રક્ષા માટે શ્રોતાઓને લલકારવામાં આવતા તે જ વખતે પ્રવચનોમાં તીર્થરક્ષા માટે ફંડ પણ ભેગું કર્યું. અને “જૈન તીર્થરક્ષા ટ્રસ્ટની સ્થાપના થઈ.
