________________ विमर्शश्च प्रकर्षश्च, तमापृच्छय गतौ ततः / वीक्षितुं तत्र विषयाभिलाषं मोहसैन्यगम् // 332 // प्राप्तौ तामसचित्ताख्यं, नगरं गरनिर्मितम् / शर्मदं चौरवृन्दानां, साधूनामरतिप्रदम् // 333 // सर्वतोऽपि यदन्यायधूमधाराभिरावृतम् / पलायन्ते गुणा यस्मान्मिलिता मशका इव // 334 // उद्योताभावतो नैति, दिनं यत्र कदाचन / विलासं कलयत्युच्चैः केवलैव महानिशा // 335 // भवाभिनन्दिता यत्र, परिखा वलयायिता / अनादिकूटसंस्कारो, दुर्गोऽस्ति परदुर्ग्रहः // 336 // यत्रानध्यवसायोऽधीरधर्मश्चाविवेचनम् / अव्रतत्वमनैश्वर्यमित्येषोऽस्ति तमोगणः' // 337 // दवदग्धमिवारण्यं, ताभ्यां तदपि वीक्षितम् / भूरिलोकोज्झितं किन्तु, न मुक्तं निजशोभया . // 338 // तत् तादृग् विस्मितः प्रेक्ष्य, प्रकर्षः प्राह मातुलम् / .. मूलनेताऽस्ति नो वाऽत्र, नैवास्तीत्यब्रवीच्च सः // 339 // ताभ्यामत्रान्तरे दुष्टः, प्रविविक्षुः पुरं पुरः / शोकाख्यः प्रातिपथिको, दैन्याक्रन्दादिसंयुतः // 340 // ताभ्यां सम्भाषितश्चायं, भद्रास्मिन् कः पुरे नृपः / शोकः प्राह पुरस्यास्य, ख्यातो न्वीशो जगत्त्रये // 341 // रागकेसरिणो भ्राता, महामोहनृपात्मजः / भर्ताऽविवेकितायाश्च, नृपोऽसौ महसां निधिः // 342 // दृष्टिभ्रूभङ्गुरा यस्यां, पतत्यस्य तडिन्निभा / दूराद् देवा अपि त्रस्ताः, कुर्वन्त्यस्यै दिशे नमः . // 343 // 158
