________________ ततश्च सन्ध्यासमये, कृत्वा देवार्चनं पुनः / कृतावश्यककर्मा च, कुर्यात् स्वाध्यायमुत्तमम् // 300 // न्याय्ये काले ततो देव-गुरुस्मृतिपवित्रितः / निद्रामल्पामुपासीत, प्रायेणाऽब्रह्मवर्जकः // 301 // निद्राच्छेदे योषिदङ्ग-सतत्त्वं परिचिन्तयेत् / स्थूलभद्रादिसाधूनां, तन्निवृत्तिं परामृशन् // 302 // यकृच्छकृन्मलश्लेष्म-मज्जास्थिपरिपूरिता / स्नायुस्यूता बही रम्याः, स्त्रियश्चर्मप्रसेविकाः // 303 // बहिरन्तविपर्यासः, स्त्रीशरीरस्य चेद् भवेत् / तस्यैव कामुकः कुर्याद्-गृध्रगोमायुगोपनम् // 304 // स्त्रीशस्त्रेणापि चेत् कामो-जगदेतज्जिगीषति / तुच्छपिच्छमयं शस्त्रं, किं नादत्ते स मूढधीः ? // 305 // सङ्कल्पयोनिनाऽनेन, हहा ! विश्वं विडम्बितम् / तदुत्खनामि सङ्कल्पं, मूलमस्येति चिन्तयेत् // 306 // यो यः स्याद् बाधको दोष-स्तस्य तस्य प्रतिक्रियाम् / चिन्तयेद् दोषमुक्तेषु, प्रमोदं यतिषु व्रजन् // 307 // दुःस्थां भवस्थिति स्थेम्ना, सर्वजीवेषु चिन्तयन् / निसर्गसुखसर्गं ते-ष्वपवर्म विमार्गयेत् / // 308 // संसर्गेऽप्युपसर्गाणां, दृढव्रतपरायणाः / / धन्यास्ते कामदेवाद्याः, श्लाघ्यास्तीर्थकृतामपि // 309 // जिनो देवः कृपा धर्मो, गुरवो यत्र साधवः / श्रावकत्वाय कस्तस्मै, न श्लाघेताऽविमूढधीः ? // 310 // . जिनधर्मविनिर्मुक्तो, मा भूवं चक्रवर्त्यपि / स्यां चेटोऽपि दरिद्रोऽपि, जिनधर्माधिवासितः // 311 //
