________________ अपसारितेन्धनभरः शेषः स्तोकेन्धनोऽनलो ज्वलितः / तस्मादपनीतो वा निर्वाति यथा मनस्तद्वत् // 912 // ज्वलति ततश्च ध्यानज्वलने भृशमुज्ज्वले यतीन्द्रस्य / निखिलानि विलीयन्ते क्षणमात्राद् घातिकर्माणि // 913 // ज्ञानावरणीयं दृष्ट्यावरणीयं च मोहनीयं च / विलयं प्रयान्ति सहसा सहान्तरायेण कर्माणि // 914 // संप्राप्य केवलज्ञानदर्शने दुर्लभे ततो योगी / जानाति पश्यति तथा लोकालोकं यथावस्थम् // 915 // देवस्तदा स भगवान् सर्वज्ञः सर्वदय॑नन्तगुणः / विहरत्यवनीवलयं सुरासुरनरोरगैः प्रणतः // 916 // वाग्ज्योत्स्नयाऽखिलान्यपि विबोधयति भव्यजन्तुकुमुदानि / उन्मूलयति क्षणतो मिथ्यात्वं द्रव्यभावगतम् // 917 // तन्नामग्रहमात्रादनादिसंसारसंभवं दुःखम् / . भव्यात्मनामशेषं परिक्षयं याति सहसैव . // 918 // अपि कोटिशतसङ्ख्याः समुपासितुमागताः सुरनराद्याः / क्षेत्रे योजनमात्रे मान्ति तदाऽस्य प्रभावेण // 919 // त्रिदिवौकसो मनुष्यास्तिर्यञ्चोऽन्येऽप्यमुष्य बुध्यन्ते / निजनिजभाषानुगतं वचनं धर्मावबोधकरम् // 920 // आयोजनशतमुग्रा रोगाः शाम्यन्ति तत्प्रभावेण / उदयिनि शीतमरीचाविव तापरुजः क्षितेः परितः // 921 // मारीतिदुर्भिक्षातिवृष्ट्यनावृष्टिडमरवैराणि / न भवन्त्यस्मिन् विहरति सहस्ररश्मौ तमांसीव // 922 // मार्तण्डमण्डलश्रीविडम्बि भामण्डलं विभोः परितः / आविर्भवत्यनुवपुः प्रकाशयत्सर्वतोऽपि दिशः // 923 // .. 145
