________________ कारावियाई चेइयहराइं पवराई सिरिजिणिदाणं / मणहरपडिमा तेसु य पइट्ठिया तिजयपुज्जाओ // 336 // विहिया य संघपूया असई पडिलाभिया महामुणिणो / साहम्मियवच्छलं बहुसो वि कयं तह महल्लं // 337 // सुपसत्थपुत्थयाई, तहा अणेगा य पुत्थियाओ य / मए भराविय विहिया सुयनाणपवा बहुजणाणं // 338 // नवबिंबाण पवेसो सपुत्थयाणं कराविओ बहुसो / तिकालमच्चणाई सिरिजिणबिंबाण विहियाई // 339 // पडिबोहो भव्वाणं, सुसाहु-सुगुरूण पज्जुवासणया / फुल्लंकाण पयाणं पव्वज्जाभिमुहसड्डाणं // 340 // नियऽवच्चाईयाणं पव्वज्जाए विसज्जणं तह य / पव्वज्जउच्छवाणं करावणं वरविभूईए // 341 // रइओ जिण्णुद्धारो, पोसहसालाण तह य कारवणं / परिगहपमाणगहणं, विहिया उचियाइदाणविही // 342 // भद्दाईण तवाणं करणं सिद्धंत-सत्थवुत्ताणं / उज्जावणं च तेसिं तह जिणगिहलक्खपूयाओ // 343 // सिरिवच्छ-तिलय-मउडाइयाणि पडिमाण आभरणगाणि / विहियाई, तहाऽऽजम्मं सामाइयमुभयसंझं पि // 344 // पव्वेसु पोसहाई, दीण-अणाहाण दुत्थियजणाणं / उद्धरणं, तह धम्मियजणवच्छल्लाइकरणाई // 345 // विहियं तह साहज्जं भत्तीए जं गिलाणसाहूणं / धरिया नियहिययम्मी आजम्मं देव-गुरुभत्ती // 346 // मिच्छत्तट्ठाणाणं विवज्जणं जं मए तिविहतिविहं / विहियं, सुणियं च तहा वक्खाणं समयसुत्ताणं // 347 //
