________________ ममकाराहङ्कार-त्यागादतिदुर्जयोद्धतप्रबलान् / हन्ति परीषहगौरव-कषायदण्डेन्द्रियव्यूहान् // 180 // प्रवचनभक्तिः श्रुतस-म्पदुद्यमो व्यतिकरश्च संविग्नैः / वैराग्यमार्गसद्भा-वभावधीस्थैर्यजनकानि // 181 // आक्षेपणीं विक्षेपणी, विमार्गबाधनसमर्थविन्यासाम् / श्रोतृजनश्रोत्रमनः-प्रसादजननीं यथा जननीम् // 182 // संवेदनी च निर्वे-दनी च धर्त्या कथां सदा कुर्यात् / स्त्रीभक्तचौरजनपद-कथाश्च दूरात्परित्याज्याः // 183 // यावत्परगुणदोष-परिकीर्तने व्यापृतं मनो भवति / तावद्वरं विशुद्धे, ध्याने व्यग्रं मनः कर्तुम् // 184 // शास्त्राध्ययने चाध्या-पने च सञ्चिन्तने तथात्मनि च / धर्मकथने च सततं, यत्नः सर्वात्मना कार्यः // 185 // शास्विति वाग्विधिविद्भि-र्धातुः पापठ्यतेऽनुशिष्ट्यर्थः / / वैङिति च पालनार्थे, विनिश्चितः सर्वशब्दविदाम् . // 186 // यस्माद्रागद्वेषो-द्धतचित्तान्समनुशास्ति सद्धर्मे / सन्त्रायते च दुःखा-च्छास्त्रमिति निरुच्यते सद्भिः // 187 // शासनसामर्थ्येन तु, सन्त्राणबलेन चानवद्येन / युक्तं यत्तच्छास्त्रं, तच्चतत्सर्वविद्वचनम् // 188 // . जीवाऽजीवाः पुण्यं, पापास्रवसंवराः सनिर्जरणाः / बन्धो मोक्षश्चैते, सम्यक् चिन्त्या नव पदार्थाः // 189 // जीवा मुक्ता संसा-रिणश्च संसारिणस्त्वनेकविधाः / लक्षणतो विज्ञेया, द्वित्रिचतुःपञ्चषड्भेदाः // 190 // द्विविधाश्चराचराख्या-स्त्रिविधा स्त्रीपुंनपुंसका ज्ञेया / / नारकतिर्यग्मानुष-देवाश्चतुर्विधाः प्रोक्ताः - // 191 //
