________________ माया पिया य भाया, भज्जा पुत्ता सुही य नियगा य / इह चेव बहुविहाई, करंति भयवेमणस्साई // 144 // माया नियगमइविगप्पियम्मि अत्थे अपूरमाणम्मि। पुत्तस्स कुणंइ वसणं, चुलणी जह बंभदत्तस्स // 145 // सव्वंगोवंगविगत्तणाओ जगडणविहेडणाओ अ। कासी य रज्जतिसिओ पुत्ताण पिया कणयकेऊ // 146 // विसयसुहरागवसओ, घोरो भाया वि भायरं हणइ / आहाविओ वहत्थं; जह बाहुबलिस्स भरहवई // 147 // भज्जा वि इंदियविगारदोसनडिया करेइ पइपावं / जह सो पएसिराया सूरियकंताई तह वहिओ // 148 // सासयसुक्खतरस्सी, नियअंगसमुब्भवेण पियपुत्तो / जह सो सेणियराया, कोणियरण्णा खयं नीओ // 149 // लुद्धा सकज्जतुरिआ, सुहिणो वि विसंवयंति कयकज्जा / जह चंदगुत्तगुरुणा, पव्वयओ घाइओ राया . // 150 // नियया वि निययकज्जे, विसंवयंतम्मि हुँति खरफरुसा। जह रामसुभूमकओ, बंभक्खत्तस्स आसि खओ // 151 // कुलघरनिययसुहेसु अ, सयणे अ जणे अनिच्च मुणिवसहा / विहरंति अणिस्साए, जह अज्जमहागिरी भयवं // 152 // रूवेण जुव्वणेण य कन्नाहि सुहेहिं वरसिरीए य / न यं लुब्भंति सुविहिया, निदरिसणं जंबुनामु त्ति // 153 // उत्तमकुलप्पसूया, रायकुलवडिंसगाऽवि मुणिवसहा / बहुजणजइसंघट्ट, मेहकुमारु व्व विसहति // 154 // अवरुप्परसंबाहं, सुक्खं तुच्छं सरीरपीडा य / सारण वारण चोयण, गुरुजणआयत्तया य गणे // 155 // 13
