________________ मधुरैर्न रसैरधीरता क्वचनाध्यात्मसुधालिहां सताम् / अरसैः कुसुमैरिवालिनां प्रसरत्पद्मपरागमोदिनाम् // 11 // विषमायतिभिर्नु किं रसैः स्फुटमापातसुखैर्विकारिभिः / नवमेऽनवमे रसे मनो यदि मग्नं सतताविकारिणि // 12 // मधुरं रसमाप्य निष्पतेद्रसनातो रसलोभिनां जलम् / परिभाव्य विपाकसाध्वसं विरतानां तु ततो दृशोर्जलम् // 13 // इह ये गुणपुष्पपूरिते धृतिपत्नीमुपगृह्य शेरते / विमले सुविकल्पतल्पके क्व बहिःस्पर्शरता भवन्तु ते // 14 // हृदि निर्वृतिमेव बिभ्रतां न मुदे चन्दनलेपनाविधिः / विमलत्वमुपेयुषां सदा सलिलस्नानकलापि निष्फला // 15 // गणयन्ति जनुः स्वमर्थवत्सुरतोल्लाससुखेन भोगिनः / मदनाहिविषोग्रमूर्छनामयतुल्यं तु तदेव योगिनः // 16 // तदिमे विषयाः किलैहिका न मुदे केऽपि विरक्तचेतसाम् / परलोकसुखेऽपि निःस्पृहाः परमानन्दरसालसा अमी // 17 // मदमोहविषादमत्सरज्वरबाधाविधुराः सुरा अपि / विषमिश्रितपायसान्नवत् सुखमेतेष्वपि नैति रम्यताम् // 18 // रमणीविरहेण वह्निना बहुबाष्पानिलदीपितेन यत् / त्रिदशैदिवि दुःखमाप्यते घटते तत्र कथं सुखस्थितिः // 19 // प्रथमानविमानसंपदां च्यवनस्यापि दिवो विचिन्तनात् / हृदयं न हि यद्विदीर्यते धुसदां तत्कुलिशाणुनिर्मितम् // 20 // विषयेषु रतिः शिवार्थिनो न गतिष्वस्ति किलाखिलास्वपि / . घननन्दनचन्दनार्थिनो गिरिभूमिष्वपरद्रुमेष्विव // 21 // इति शुद्धमतिस्थिरीकृताऽपरवैराग्यरसस्य योगिनः / . स्वगुणेषु वितृष्णतावहं परवैराग्यमपि प्रवर्त्तते // 22 // કપ
