________________ 32 . . काव्यमाला / संसक्तेषु सुरामयी धनगुणाधानेषु लक्ष्मीमयी स्फीतार्थेषु सुधामयी विषमयी निष्क्रान्तवित्तेषु च / वेश्या शङ्खमयी नितान्तकुटिला सद्भावलीनेषु या देवानामपि सुनु मोहजननी क्षीरोदवेलेव सा // 133 // इति तया वचनामृतमर्पितं श्रवणपेयमवाप्य कलावती / जननि मे द्रविणाधिगमोचितं परिचयं कथयति जगाद ताम् // 134 // इति श्रीक्षेमेन्द्रविरचितायां समयमातृकायां पूजाधरोपन्यासो(?)नाम चतुर्थः समयः। पञ्चमः समयः / . अथ मन्मथमत्तानां करिणामिव कामिनाम् / बन्धाय बन्धकीशिक्षामाचचक्षे जरच्छिखा // 1 // श्रूयतां पुत्रि सर्वत्र विचित्रोपायवृत्तये / मया दुहितृवात्सल्यादर्थ्यं किंचित्तदुच्यते // 2 // पूर्व भावपरीक्षैव कार्या यत्नेन कामिनाम् / ज्ञातरागविभागानां कर्तव्यौ त्यागसंग्रहौ // 3 // कुसुम्भरागः सिन्दूररागः कुङ्कुमरागवान् / लाक्षारागोऽथ माञ्जिष्ठो रागः काषायरागभृत् // 4 // हारिद्रो नीलरागश्चेत्यष्टौ वर्णानुकारिणः / सुवर्णरागस्ताम्राख्यो रीतिरागस्तथापरः // 5 // रागः सीसकसंज्ञश्च लौहो मणिसमुद्भवः / काचरागस्तथा शैलो ह्यष्टौ धात्वनुकारिणः // 6 // सांध्यरागस्तथा चान्द्रस्तथेन्द्रायुध एव च / वैद्युताङ्गारकेत्वाख्यरविरागास्तथैव च // 7 // राहुरागोऽष्टमश्चेति रागा गगनसङ्गिनः / श्रोत्ररागोऽक्षिरागश्च रसनासंश्रयस्तथा // 8 //