________________ कुवलयमालाकहा 85 जारज्जायहो दुज्जणहो दुट्ठ-तुरंगमहो ज्जि। जेण ण पुरओ ण मग्गओ हूं तीरइ गंतुं जि।। अवि य अकए वि कुणइ दोसे कए वि णासेइ जे गुणे पयडे। विहि-परिणामस्स व दुज्जणस्स को वा ण बीहेइ।। अहवा। कीरउ कहा-णिबंधो भसमाणे दुज्जणे अगणिऊण। किं सुणएहिँ धरिज्जइ विसंखलो मत्त-करिणाहो।। 12. होति सुयण च्चिय परं गुण-गण-गरुयाण भायणं लोए। मोत्तूण णई-णाहं कत्थ व णिवसंतु रयणाइं॥ तेण सज्जण-सत्थो च्चेय एत्थ कहा-बंधे सोउमभिउत्तो त्ति। सो व सज्जणो कइसउ। रायहंसो जइसउ, विसुद्धो-भय पक्खो पय-विसेसण्णुओ व। तहेव रायहंसो वि उब्भड-जलयाडंबर-सद्देहिँ पावइ माणसं दुक्खं। सज्जणु पुण जाणइ ज्जि खल-जलयहं सभावाई।। तेण हसिउं अच्छइ। होइ पुण्णिमाइंदु जइसउ, सयल-कला-भरियउ जणमणाणंदो व्व। तहे पुण्णिमायंदो वि कलंक-दूसिओ अहिसारियाण मण-दूमिओ व। सज्जणो पुण अकलंको सव्व-जण-दिहि-करो ब्व। अवि मुणालु जइसउ, खंडिज्जंतो वि अक्खुडियणेह-तंतु सुसीयलो व, तहेव मुणालु वि ईसि-कंडूल-सहाउ जल-संसग्गि वढिओ व्व। सज्जणु पुणु महुरसहावु वियड्ढ-वड्डिय-रसो व्व। हूं, दिसागओ जइसउ, सहावुण्णउ अणवरय-पयट्ट-दाण-पसरो व्व। तहे दिसागओ वि मय-वियारेण घेप्पड़, दाण-समए व्व सामायंत-वयणो होइ। सज्जणु पुणि अजाय-मय-पसरु देंतहो व्व वियसइ वयण-कमलु। होउ मुत्ताहारु जइसउ, सहाव-विमलो बहु-गुण-सारो व्व। तहेव मुत्ताहारो वि छिड्ड-सय-णिरंतरो वण-वड्डिउ व्व। सज्जणो पुण अच्छिड्ड-गुण-पसरो णायरउ व्व। किं बहुणा, समुद्दो जइसओ, गंभीर-सहाओ-महत्थो व्वा तहेव समुद्दो वि उक्कलिया-सय-पउरो णिच्च-कलयलारावुब्वेविय-पास-जणो व्व दुग्गय-कुडुंबहो जि अणुहरइ। सज्जणु पुण मंथर-सहाओ महु-महुर-वयण-परितोसिय-जणवउ व्व त्ति। अवि य। सरलो पियंवओ दक्खिण्णो चाई गुणण्णुओ सुहवो।
