________________
१००
जम्बूद्वीप प्रज्ञप्ति सूत्र
गोयमा! काले भविस्सइ हाहाभूए, भंभाभूए, कोलाहलभूए, समाणुभावेण य खरफरुसधूलिमइला, दुव्विसहा, वाउला, भयंकरा य वाया संवडगा य वाइंति, इह अभिक्खणं २ धूमाहिति य दिसा समंता रउस्सला रेणुकलुसतमपडलणिरालोया, समयलुक्खयाए णं अहियं चंदा सीयं मोच्छिहिंति, अहियं सूरिया तविस्संति, अदुत्तरं च णं गोयमा! अभिक्खणं २ अरसमेहा, विरसमेहा, खारमेहा, खत्तमेहा, अग्गिमेहा, विज्जुमेहा, विसमेहा, अजवणिजोदगा, वाहिरोगवेयणोदीरणपरिणामसलिला, अमणुण्णपाणियगा चंडाणिलपहयतिक्खधाराणिवायपउरं वासं वासिहिति, जेणं भरहे वासे गामागरणगरखेडकब्बडमडंबदोणमुहपट्टणासमगयं जणवयं, चउप्पयगवेलए, खहयरे, पक्खिसंधे गामारण्णप्पयारणिरए तसे य पाणे, बहुप्पयारे रुक्खगुच्छगुम्मलयवल्लिपवालंकुरमाइए तणवणस्सइकाइए ओसहीओ य विद्धंसेहिंति, पव्वयगिरिडोंगरुत्थलभट्टिमाइए य वेयह गिरिवजे विरावेहिति, सलिलबिलविसमगत्तणिण्णुण्णयाणि य गंगासिंधु-वजाइं समीकरोहिंति।
तीसे णं भंते! समाए भरहस्स वासस्स भूमीए केरिसए आयारभावपडोयारे भविस्सइ?
गोयमा! भूमी भविस्सइ इंगालभूया, मुम्मुरभूया, छारियभूया, तत्तकवेल्लुयभूया, तत्तसमजोइभूया, धूलिबहुला, रेणुबहुला, पंकबहुला, पणयबहुला, चलणिबहुला, बहूणं धरणिगोयराणं सत्ताणं दुण्णिक्कमा यावि भविस्सइ।
तीसे णं भंते! समाए भरहे वासे मणुयाणं केरिसए आयार भावपडोयारे भविस्सइ?
गोयमा! मणुया भविस्संति दुरूवा, दुव्वण्णा, दुगंधा, दुरसा, दुफासा, अणिट्ठा, अकंता, अप्पिया, असुभा, अमणुण्णा, अमणामा, हीणस्सरा, दीणस्सरा, अणिट्ठस्सरा, अकंतस्सरा, अप्पियस्सरा, अमणुण्णस्सरा, अमणामस्सरा, अणादेज्जवयणपच्चायाया, णिल्लज्जा, कूड-कवड-कलह-बंध-वेर-णिरया, मजायातिक्कमप्पहाणा, अकजणिच्चुज्जुया गुरुणिओगविणयरहिया य,
Jain Education International
For Personal & Private Use Only
www.jainelibrary.org
