________________
१९६
प्रज्ञापना सूत्र
एगं जोयणसहस्सं ओगाहित्ता हेट्ठा चेगं जोयणसहस्सं वज्जित्ता मज्झे अट्ठहुत्तरे जोयणसयसहस्से एत्थ णं असुरकुमाराणं देवाणं चउसट्टिं भवणा-वाससयसहस्सा भवतीति मक्खायं ।
***
ते णं भवणा बाहिं वट्टा, अंतो चउरंसा, अहे पुक्खरकण्णियासंठाणसंठिया, उक्किण्णंतरविउल-गंभीरखायफलिहा, पागारट्टालय-कवाड - तोरण- पडिदुवारदेसभागा, जंतसयग्घी - मुसल-मुसुंढिपरियारिया, अउज्झा, सया जया, सया गुत्ता, अडयालकोट्ठगरइया, अडयालकयवणमाला, खेमा, सिवा, किंकरामरदंडोवरक्खिया, लाउल्लोइयमहिया, गोसीस - सरसरत्तचंदण - दद्दरदिण्णपंचंगुलितला, उवचियचंदणकलसा, चंदणघडसुकयतोरणपडिदुवारदेसभागा, आसत्तोसत्तविउलवट्टवग्घारियमल्लदामकलावा, पंचवण्णसरससुरभिमुक्कपुप्फ-पुंजोवयारकलिया, कालागुरुपवरकुंदुरुक्क तुरुक्क डज्झतधूवमघमघंतगंधुद्धया-भिरामा, सुगंधवरगंधिया, गंधवट्टिभूया, अच्छरगणसंघसंविगिण्णा, दिव्वतुडियसद्दसंपणइया, सव्वरयणामया । अच्छा, सण्हा, लण्हा, घट्टा, मट्ठा, णीरया, णिम्मला, णिप्पंका, णिक्कंकडच्छाया, सप्पभा, सस्सिरीया, समरीइया, सउज्जोया, पासाईया, दरिसणिज्जा, अभिरूवा, पडिरूवा ।
एत्थ णं, असुरकुमाराणं देवाणं पज्जत्तापज्जत्तगाणं ठाणा पण्णत्ता । उववाएणं लोयस्स असंखिज्जइभागे, समुग्धाएणं लोयस्स असंखिज्जइभागे, सट्टाणेणं लोयस्स असंखिज्जइभागे ।
Jain Education International
तत्थ णं बहवे असुरकुमारा देवा परिवसंति । काला, लोहियक्खबिंबोट्ठा, धवलपुप्फदंता, असियकेसा, वामेयकुंडलधरा, अद्दचंदणाणुलित्तगत्ता, ईसीसिलिंधपुप्फप्पगासाइं असंकिलिट्ठाई सुहुमाई वत्थाई पवरपरिहिया, वयं च पढमं समइक्कंताबिइयं च वयं असंपत्ता, भद्दे जोव्वणे वट्टमाणा, तलभंगय- तुडियपवरभूसण- णिम्मल, मणिरयणमंडियभुया, दसमुद्दामंडियग्गहत्था, चूडामणिविचित्तचिंधगया, सुरूवा, महिड्डिया, महज्जुइया, महायसा, महब्बला, महाणुभागा, महासोक्खा, हारविराइयवच्छा, कडय-तुडियथंभियभुया, अंगय- कुंडलमट्ठगंडयलकण्णपीढधारी, विचित्तहत्था
For Personal & Private Use Only
www.jainelibrary.org
