________________
श्रीदानोपदेशमाला (गा. ६.) विषधूपप्रयोगेण, तदङ्गजकृतेन तौ । कीनाशातिथितां प्राप्तौ, नान्यथा भवितव्यता ॥ २८३ ॥ अथोत्तरकुरुष्वेतावभूतां युग्मधर्मिणौ । पूर्णायुष्कौ च सौधर्मे जज्ञाते स्नेहलौ सुरौ ॥ २८४ ॥ जीवः श्रीवज्रसेनस्य भुक्त्वा भोगांस्ततश्च्युतः । जम्बूद्वीपे विदेहेषु, पुरे क्षितिप्रतिष्ठिते ॥ २८५ ॥ सुविधेवैद्यराजस्य, जीवानन्दः सुतोऽजनि । तदा तत्र पुरेऽन्येऽपि चत्वारः शिशवोऽभवन् ॥ २८६॥ युग्मम् ॥ तत्राद्योऽभवदीशानचन्द्रावनिबिडौजसः । कान्तायां कनकवत्यां सुतो नाम्ना महीधरः ॥ २८७ ॥ द्वितीयोऽद्वैतमहिमा सुनासीरस्य मन्त्रिणः । लक्ष्यां पत्न्यां महाबुद्धिः, सुबुद्धिरिति नन्दनः ॥ २८८ ॥ श्रीमत्सागरदत्तस्य, सार्थवाहस्य योषिति । अभूदभयमत्यां श्रीपूर्णचन्द्राभिधः सुतः ॥ २८९ ॥ श्रीधनश्रेष्ठिकान्तायां, शीलमत्यां तनूभवः । तुर्यः शीलेन नाम्ना च, ख्यातो जातो गुणाकरः ॥ २९० ॥ श्रीमत्या अपि जीवोऽत्र पत्तने स्वर्गतश्च्युतः । अभूदीश्वरदत्तस्य, श्रेष्ठिनः केशवोऽङ्गभूः ॥ २९१ ।। एते षडपि तारुण्यलक्ष्मीभाजः परस्परम् । कार्तिकेयमुखानीव, मित्रभावमशिश्रियन् ॥ २९२ ॥ ग्रहेष्विव निशाधीशस्तरुष्विव सुरद्रुमः । जीवानन्दोऽभवद्वैद्यविद्यावेदिषु पुङ्गवः ॥ २९३ ॥ भुञ्जाना रममाणाश्च, बान्धवा इव तेऽन्यदा । जीवानन्दगृहे तस्थुः, पार्थिवे षड्गुणा इव ॥ २९४ ॥
Jain Education International
For Personal & Private Use Only
www.jainelibrary.org
