________________
३९४
तत्रास्ति नास्तिकः प्रास्तारिः प्रदेशी नरेश्वरः । यत्कोपाग्निकणायन्ते तपनाद्या महस्विनः ॥ १३॥ सूर्यकान्तास्ति तत्कान्ता, सूर्यकालस्तदङ्गभूः । तन्मन्त्री चित्रनामा च जैनतत्त्वविदांवर : ॥ १४॥ प्रदेशिना महीशेन सोऽन्यदा प्रैषि मन्त्रिराट् । श्रावस्त्यां राजकार्यार्थं जितशत्रुनृपान्तिकम् ॥ १५ ॥ राजकार्यं विधायासौ तत्रस्थान् गणधारिण: | श्रीकेशिसंज्ञकान् विज्ञान्, प्राणंसीत्प्राणिपालकान् ॥ १६॥ गृहिधर्मफलं श्रुत्वामात्यः श्रीकेशिसूरितः । व्रतानि द्वादशाप्याशु ससम्यक्त्वान्युपाददे ॥ १७॥ श्रीश्वेतवीविहाराय गुरूनभ्यर्थ्य भक्तितः । जगाम धाम मन्त्रीशः पुण्यप्राप्तिप्रहर्षितः ॥ १८॥ अथ श्रीकेशिनो नृणां पूरयन्तो मनोरथान् । श्वेतव्या भूषयामासुरुद्यानं स्वद्रुमा इव ॥ १९॥ वनपालमुखान्मन्त्री विज्ञायागमनं गुरोः । स्वस्थानस्थस्तमानम्य, मनस्येवमचिन्तयत् ॥ २० ॥ चेत्स्वामी धीसखे सख्यौ, सत्यपि श्वभ्रपात्ययम् । तदा मदीयसंसर्गेऽफलोऽस्येक्षुप्रसूनवत् ॥ २१॥ तत् स्यात्केनाप्युपायेन गुरोः पार्श्वं नयाम्यमुम् । श्रावयामि च तद्वाणीं सुधामिव रसोत्तराम् ॥ २२॥ वाहकेलिच्छलान्मन्त्री, प्रजापालं प्रदेशिनम् । निन्ये केश्याश्रितं देशं शिवं बोधिरिवाङ्गिनम् ॥ २३ ॥ तरोरधः स्थितः श्रान्तः सूरीणां देशनावचः । कृशानुमिव सोऽमंस्त कोकवच्छशिनो महः ॥ २४॥
श्रीदानोपदेशमाला (गाथा. १०५)
Jain Education International
For Personal & Private Use Only
www.jainelibrary.org
